Հնդկաստանի Ահմեդաբադ քաղաքում 400 մետր երկարությամբ պատ են կառուցում՝ ԱՄՆ նախագահ Դոնալդ Թրամփի ժամանմանն ընդառաջ քաղաքի ետնախորշերը թաքցնելու նպատակով։ Այս մասին հաղորդում է Reuters գործակալությունը:
Տեղական իշխանությունների ներկայացուցիչը բացատրել է, որ պատն անվտանգության նկատառումներով է կառուցվում, ինչպես նաև աշխատանքները տարվում են տարածքի ընդհանուր բարեկարգման համար:
Պետության պատվերով պատը կառուցող կապալառու ընկերությունն այլ կերպ է մեկնաբանում ծրագրի նպատակները։ Պատն օդանավակայանից դեպի քաղաք տանող ճանապարհի երկայնքով կկառուցվի, որով Թրամփը կուղևորվի Հնդկաստանի վարչապետ Նարենդրա Մոդիի հետ հանդիպմանը:
Նշվում է, որ 150 բանվոր աշխատում է շուրջօրյա, որ կարողանա ծրագիրը մինչև ԱՄՆ նախագահի գալն ավարտին հասցնել: Ճանապարհի երկայնքով տարածվող ետնախորշերում մոտ 800 աղքատ ընտանիք է ապրում:
