Մենք հետևելու ենք քրեական գործին: Այս մասին այսօր՝ դեկտեմբերի 5-ին, ԱԺ-ում լրագրողների հետ զրույցում ասաց «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով Սերժ Սարգսյանին մեղադրանք առաջադրելուն:
Նա նշեց, որ Սերժ Սարգսյանին մեղադրանք առաջադրելը զուտ իրավական գործընթաց է և քաղաքական տարրեր տեսնելու համար պետք է լինեն հանգամանքներ, որ այդ քրեական գործը շինծու է, կեղծ է, ապացույցներ չկան:
«Բայց եկեք տեսնենք, թե ինչ են ասում հանրապետականներն իրենց գրառումներում: Ասում են, որ Սերգո Կարապետյանը, իրենց նշանակած նախարարը ցուցմունք տվեց Սերժ Սարգսյանի դեմ և դուք կտեսնեք… ու քննադատություն իշխանության հասցեին, որ դա քաղաքական հետապնդում է և այլն: Դա նույնն է, որ Մանե Թանդիլյանն իմ դեմ ցուցմունք տա, ես բողոքեմ Նիկոլից: Տրամաբանությունը ո՞րն է: Եթե նման բան եղել է, ձեր նախարարը գործով ցուցմունք է տվել և քրգործը քննվում է:
Ավելին, իրենք երկար ժամանակ պնդում են, որ Սերժ Սարգսյանը պետք է կալանավորվի, չի կալանավորվել: Ինչ վերաբերում է լռեցնելու փորձին, ապա Սերժ Սարգսյանը լուռ է եղել և միշտ ասել է, որ ժամանակը կգա, կխոսեմ: Հետևաբար, ինչն են լռեցրել»,-ասաց Մարուքյանը:
Դիտարկմանը, որ կարող է Զագրեբում Սերժ Սարգսյանի ելույթն է պատճառը, Մարուքյանն ասաց, որ Զագրեբի ելույթը կարող է հենց դիտարկվել այս գործի շրջանակներում:
«Որ իմացել են, որ քրգործ է քննվում, ակտիվացել են, որ ասեն՝ քաղաքական հետապնդում է: Մենք հետևելու ենք քրեական գործին, եթե խնդիր լինի, կիմանանք, կասենք: Հրապարակային դատաքննություն է լինելու»,-եզրափակեց նա։