Իրանի գերագույն առաջնորդ Այաթոլլա Ալի Խամենեիի մահվանից չորս ամիս անց Թեհրանում մեկնարկել է նրա բազմօրյա հոգեհանգստի արարողությունը։ Ինչպես հաղորդում է իրանական պետական լրատվամիջոցները, շաբաթ օրը հազարավոր մարդիկ հավաքվել են Թեհրանի «Իմամ Խոմեյնի» մզկիթում՝ հարգանքի տուրք մատուցելու Խամենեիի և փետրվարի 28-ին տեղի ունեցած ավիահարվածների հետևանքով զոհված նրա ընտանիքի անդամների հիշատակին։
Պաշտոնական Թեհրանը հայտարարել է, որ արարողության ձգձգումը պայմանավորված է եղել «պատերազմական պայմաններով»։ Վերլուծաբանների կարծիքով՝ այս միջոցառումը Իրանի իշխանությունների փորձն է՝ ցույց տալու երկրի ներքին կայունությունն ու վերահսկողությունը։ Արարողության ընթացքում հնչել են հակաամերիկյան կոչեր, իսկ մասնակիցները ծածանել են «Հեզբոլլահ» շարժման դրոշներ։
Ուրբաթ օրը կայացած նախնական արարողություններին մասնակցել են Ռուսաստանի, Պակիստանի, Իրաքի պատվիրակությունները և ՀԱՄԱՍ-ի ներկայացուցիչներ։ Իրանի նախագահ Մասուդ Փեզեշքիանը և խորհրդարանի խոսնակ Մոհամմադ Բաղեր Ղալիբաֆը ներկա են եղել աղոթքներին, սակայն Խամենեիի որդին՝ Մոջթաբա Խամենեին, որը պաշտոնապես ստանձնել է ղեկավարումը մարտ ամսին, հանրությանը չի ներկայացել։
Հոգեհանգստի արարողությունները շարունակվելու են մինչև շաբաթվա վերջ, որից հետո մարմինը կտեղափոխվի Ղում, իսկ երկուշաբթի՝ Իրաքի Նաջաֆ և Քերբելա քաղաքներ։ Հուղարկավորությունը տեղի կունենա հինգշաբթի օրը՝ Խամենեիի ծննդավայր Մաշհադում։
Իրանական հասարակությունը, սակայն, պառակտված է։ HRANA իրավապաշտպան կազմակերպության տվյալներով՝ 2025 թվականի վերջին տեղի ունեցած հակակառավարական ցույցերի ժամանակ Խամենեիի վարչակազմի իրականացրած բռնաճնշումների հետևանքով զոհվել է առնվազն 7000 մարդ, ինչը դեռևս խորը վերք է շատ քաղաքացիների համար։