Իրանի արտգործնախարար Աբբաս Արաղչին Մեծ Բրիտանիայի և Ֆրանսիայի իր գործընկերների հետ հեռախոսազրույցի ժամանակ հայտարարել է, որ Իրանը չի հրաժարվի Թեհրանում ՀԱՄԱՍ-ի քաղբյուրոյի ղեկավար Իսմայիլ Հանիեի սպանության համար Իսրայելին պատասխան հարված հասցնելու իր բացարձակ իրավունքից։
Ըտս իրանական ԻՐՆԱ գործակալության՝ Իրանի ԱԳՆ ղեկավարը Ֆրանսիայի և Մեծ Բրիտանիայի արտգործնախարարներ Ստեֆան Սեժուրնեի և Դեյվիդ Լեմիի հետ առանձին հեռախոսազրույցի ընթացքում ընդգծել է Թեհրանի նկատմամբ սիոնիստական ռեժիմի հանցավոր և ահաբեկչական գործողությանն արձագանքելու Իրանի բացարձակ իրավունքը։
Արաքչին Թեհրանում ՀԱՄԱՍ-ի քաղաքական առաջնորդի սպանության համար սիոնիստական օկուպացիոն ռեժիմի հանցավոր գործողությունները որակել է Իրանի անվտանգության և ինքնիշխանության աններելի խախտում՝ վերահաստատելով, որ Իրանն ագրեսորին պատժելու իրավունք ունի։
Ըստ Ֆրանսիայի ԱԳՆ-ի՝ Սեժուրնեն հիշեցրել է, որ Ֆրանսիայի գլխավոր առաջնահերթությունը Իրանում պատանդ պահվող ֆրանսիացի քաղաքացիների անհապաղ ազատումն է, ինչի մասին Ֆրանսիայի նախագահն արդեն խնդրել է իր իրանցի գործընկերոջը։
Ստեֆան Սեժուրնեն նաև խիստ մտահոգություն է հայտնել տարածաշրջանում աճող լարվածության կապակցությամբ։ Նա Աբբաս Արաղչիին կոչ է արել ձեռնարկել բոլոր միջոցները, որպեսզի հակամարտությունը չտարածվի ամբողջ տարածաշրջանում, որում ոչ ոք շահագրգռված չէ, այդ թվում նաև՝ Իրանը։
Ֆրանսիայի արտգործնախարարն Իրանին խնդրել է առավելագույն զսպվածության կոչ անել տարածաշրջանում Թեհարնի աջակցությունը վայելող և ապակայունացում առաջացնող բոլոր կողմերին:
Նա նշել է, որ տարածաշրջան կատարած իր վերջին այցի ժամանակ ազդանշան է ուղարկել բոլոր շահագրգիռ կողմերին՝ առաջարկելով գնալ լարվածության թուլացման ճանապարհով, մասնավորապես Իսրայելի և Լիբանանի միջև հարաբերություններում։
Ստեֆան Սեժուրնեն զգուշացրել է Իրանի ապակայունացնող գործությունները շարունակելու անթույլատրելիությունը:
Նա ընդգծել է Ֆրանսիայի հավատարմությունը վստահելի քաղաքական շրջանակին՝ տարածաշրջանում խաղաղություն և անվտանգություն ապահովելու համար՝ պայմանով, որ Իրանը կատարի իր միջազգային պարտավորությունները:
