Իրանի առողջապահության նախարարությունը երկրի տարածքում կորոնավիրուսով վարակման 13 նոր դեպք է գրանցել. վարակվածներից երկուսը մահացել են: Այս մասին հաղորդում է РИА Новости գործակալությունը՝ հղում անելով նախարարության պաշտոնական ներկայացուցիչ Կիանուշ Ջահանփուրին:
«Այսօրվա ստուգումների արդյունքում կորոնավիրուսով վարակման 13 նոր դեպք է գրանցվել, նոր վարակվածներից երկուսը, ցավոք, մահացել են»,-հայտարարել է Ջահանփուրը:
Այսպիսով՝ վարակման դեպքերի ընդհանուր թիվը հասել է 18-ի:
Նրա խոսքով՝ նոր հիվանդների մեծ մասը կա՛մ Ղոմ քաղաքի բնակիչներ են (շիա մահմեդականների ուխտագնացության քաղաքներից մեկը, ուր այցելում են նաև այլ երկրներից), կամ վերջին շրջանում գտնվել են այդ քաղաքում: Այսպիսով՝ վարակման 13 դեպքերից 7-ը գրանցվել են Ղոմում: Վիրուսը հասել է նաև մայրաքաղաք. Թեհրանում գրանցվել է 4 դեպք, ևս երկուսը՝ Գիլյան նահանգում:
Ավելի վաղ Ղոմի բժշկական գիտությունների համալսարանի ղեկավար Մոհամադ Ռեզա Ղադիրը գործակալությանը տեղեկացրել էր, որ Իրանում կորոնավիրուսի տարածման հետ կապված իրավիճակը ծայրահեղ չէ և անհանգստության կարիք չկա:
Հիշեցնենք, որ երեկ՝ փետրվարի 20-ին, Իրանում կորոնավիրուսով վարակված 2 քաղաքացի է մահացել:
