Իկոնիկ

Ֆրանսիական երեք մելանխոլիկ և հիասքանչ երգ. Ne Me Quitte Pas, Bonjour, Tristesse և Ma Mémoire Sale

Ֆրանսիական այս երեք հիանալի երաժշտական գործերին միավորում է տխրության և մելանխոլիայի զգացումները։ Նաև այն, որ կերպարները ընդունում են այդ էմոցիաները և վերապրում յուրաքանչյուր պահը՝ անհնարին տգեղից մինչև էքստազային գեղեցիկը։

Ne me quitte pas (Մի լքիր ինձ) երգը ստեղծվել է բելգիացի երգիչ և երգահան Ժակ Բրելի կողմից, 1959 թ.։ Ne me quitte pas-ն ոմանց կողմից համարվում է Բրելի լավագույն գործը։ Այն գրվել է այն բանից հետո, երբ Բրելի սիրուհին՝ Զիզուն (Սյուզաննա Գաբրիելո) լքել էր նրան և «ջնջել» իր կյանքից: Պատճառը այն էր, որ Զիզուն հղի էր և Բրելը չէր պատրասվում ընդուներ երեխային։ Բրելի՝ երեխային չընդունելու փաստը, ստիպում է Զիզուին աբորտ անել։

Այս երգը ոչ այնքան սիրային երգ է, որքան՝ օհներգ տղամարդկային վախկոտությանը։ Այն նվաստացման, ափսոսանքի և տանջանքների մասին է։ Բրելի կենդանի կատարումը այնքան հանճարեղ և անկեղծ է,որ այն տեսնելիս մարմնով ուղղակիորեն սարսուռ է անցնում։

Bonjour, Tristesse (Բարև, տխրություն) երգը գրվել է 1958 թ.ին համանուն ֆիլմի համար։ Այն հիանալիորեն կատարում է Ջուլիետ Գրեկոն, թե՛ անգլերեն, թե՛ ֆրանսերեն լեզուներով։ Այս գործի մեղեդին և բառերը չեն կարող մելանխոլիայի զգացողություն չառաջացնեն։

Երգը պատմում է մի աղջկա մասին, ով պարբերաբար գտնվում է մելանխոլիայի, տխրության, գուցե և դեպրեսիայի աշխարհում։ Նա անէմոցիոնալ է, հոգնել և ձանձրացել է ամենից, ինչ կատարվում է իր շուրջը։ Բայց նա գեղեցկություն և կարեկցանք է գտնում դրա մեջ և հաշտվում այդ էմոցիաների հետ։

Ma mémoire sale (Իմ կեղտոտ հիշողությունը) երգը կատարում է ֆրանսիացի դերասան Լուի Գարելը Les Chansons d’Amour ֆիլմում (2007)։

Երգը պատմում է մի մարդու մասին, ով կորցրել է իր սիրուն, կոտրվել և կորցրել ինքն իրեն։ Հանդիպելով նոր մարդու՝ ում հանդեպ զգացմունքներ է սկսում ունենալ, սկսում է պատմել իր ցավի մասին։ Նա խնդրում է, որպեսզի նոր սիրելին բուժի իր ցավերը, կամ ինչպես երգի բառերում է ասվում՝ «լվանա իր կեղտոտ մտքերը»։

Երգը դանդաղ է և հիմնականում կարելի է լսել միայն կիթառի ձայնը, որը կատարյալ կերպով համատասխան է ամբողջ մթնոլորտին։ Այն յուրահատուկ տխրության քող է կրում, որը միառժամանակ դարձնում է այս երգը հիասքանչ և մելանխոլիկ։

Աննա Մարտիրոսյան

 

ՎԵՐՋԻՆ ԼՈւՐԵՐ

ՎԵՐԵՎ