Այսօր լրագրողների հետ զրույցում «Իմ քայլը» խմբակցության ղեկավար Լիլիթ Մակունցը նշեց, որ խմբակցության նախագիծը, որով քննարկվում է Սահմանադրական դատարանի նախագահ Հրայր Թովմասյանի լիազորությունների դադարեցման գործընթացը սկսելու հարցը, քննարկվելու է այս քառօրյայում:
«Ինչ վերաբերում է մյուս խմբակցությունների դիրքորոշումներին, եթե հիշում եք, որոշ ժամանակ առաջ նշել էի, որ եթե խմբակցությունները նպատակահարմար գտնեն արտահայտել իրենց դիրքորոշումները, ապա դա լավ կլինի հանրության ու մեզ համար՝ որպես քաղաքական ուժ: «Լուսավոր Հայաստան»-ն արդեն հայտարարել է այդ մասին, «Բարգավաճ Հայաստան» խմբակցությունում, իմ տեղեկություններով, այս պահին դեռևս չկա վերջնական ձևավորված դիրքորոշում»,- հավելեց պատգամավորը:
Նա նշեց, որ օրենսդիր մարմինը պետք է անի առավելագույնը, որպեսզի Սահմանադրական դատարանի դերը և հեղինակությունը բարձրացնի: Հենց դրա համար էլ, ըստ ԱԺ պատագամովրի, սկսել են Թովմասյանի լիազորությունների դադարեցման գործընթացը:
Այն հարցին, թե արդյոք ՍԴ-ն այս կազմով կկարողանա՞ անաչառ քննել Հրայր Թովմասյանի լիազորությունները դադարեցնելու հարցըի վերաբերյալ, Մակունցը պատասխանեց.
«Պետք է նախևառաջ առաջնորդվել այն ելակետով, որ Սահմանադրական դատարանի դատավորները կկայացնեն իրավական փաստարկների հիման վրա որոշում: Չեմ ուզում նախապես որևէ դիրքորում ներկայացնել: Կարծում եմ, ավելի ճիշտ՝ հուսանք, որ կկայացնեն անաչառ որոշում»: