Կալիֆոռնիայի Լագունա Բիչ քաղաքային իշխանությունները հայտարարել են տեղական արտակարգ դրություն՝ ափամերձ տարածքների պաշտպանությունն ու ենթակառուցվածքների վերականգնումն արագացնելու նպատակով։ «Մարի» մրրկասյունից առաջացած ուժգին ալիքները լուրջ վնաս են հասցրել ափամերձ հատվածներին, լվացել ավազի հսկայական զանգվածներ և խաթարել ծովային պատնեշների ամրությունը։ Ինչպես հաղորդում է NTD News-ը, ափամերձ էրոզիայի հետևանքով ուղղակի սպառնալիքի տակ է հայտնվել առնվազն վեց ծովափնյա առանձնատուն։
Արտակարգ դրության որոշումը ստորագրել է քաղաքային մենեջեր Դեյվ Քիֆը, ով իրականացնում է արտակարգ իրավիճակների ծառայության տնօրենի լիազորությունները։ Հատուկ կարգավիճակը թույլ է տալիս քաղաքապետարանին շրջանցել ստանդարտ պայմանագրային ընթացակարգերը և անհապաղ նախաձեռնել աղբի հեռացման, ինժեներական գնահատման, ավազի լցնման ու պատնեշների վերանորոգման աշխատանքները։ Բացի այդ, հայտարարությունը հնարավորություն է տալիս Լագունա Բիչին համագործակցել նահանգային և ֆեդերալ գերատեսչությունների հետ՝ ֆինանսական աջակցություն և կարգավորող ընթացակարգերի ճկունություն ստանալու համար։
Քաղաքային իշխանությունների փոխանցմամբ՝ ափամերձ վնասվածքների վերականգնումը հրատապ է նաև սպասվող եղանակային պայմանների պատճառով։ Որոշման մեջ վկայակոչվում են Ավկիանոսային և մթնոլորտային հետազոտությունների ազգային վարչության (NOAA) Կլիմայի կանխատեսման կենտրոնի տվյալները, համաձայն որոնց՝ 2026-2027 թվականների աշնանային և ձմեռային ամիսներին ավելի քան 90 տոկոս հավանականությամբ սպասվում է ուժեղ «Էլ Նինյո» երևույթ։ Բացի այդ, Կալիֆոռնիայի ափամերձ շրջաններում նորմայից բարձր տեղումների հավանականությունը գերազանցում է 50 տոկոսը։
Քաղաքային մենեջեր Դեյվ Քիֆը նշել է, որ տեղացիներից շատերը երբեք չեն տեսել ափից ավազի նման ծավալի կորուստ, և թեև ավազի բնական վերականգնում սպասվում է, քաղաքը չի կարող հույսը դնել միայն դրա վրա՝ հաշվի առնելով առաջիկա փոթորկային շրջանը։ Քաղաքապետ Մարկ Օրգիլը հայտնել է, որ քաղաքային բրիգադներն արդեն աշխատում են հանրային ենթակառուցվածքների վերականգնման ուղղությամբ, իսկ բնակիչներին տրամադրվում է աջակցություն շինարարական թույլտվությունների ստացման և տների անվտանգության ստուգման հարցերում։