Լեգենդար Սոֆի Լորենը, որը երկու անգամ արժանացել է «Օսկար»-ի, սեպտեմբերի 20-ին Հռոմում նշել է իր ծննդյան 90-ամյակը։
«Սոֆի Լորեն, լեգենդ, 90 տարեկան»,-ազդարարում է Il Corriere della Sera պարբերականի խորագիրը:
1934 թվականի սեպտեմբերի 20-ին Հռոմում ծնված Լորենը Իտալիայի մայրաքաղաքի պատմական կենտրոնի շքեղ հյուրանոցներից մեկում կազմակերպված մասնավոր երեկույթի ժամանակ 90 մոմ կփչի:
Հռոմի կինոթատրոնում Cinecittà ստուդիայի և մշակույթի նախարարի կազմակերպած արարողությունից հետո դերասանուհին կհանդիպի մոտ 150 ընկերների, գործընկերների և ընտանիքի անդամների հետ՝ ընթրելու համար հյուրանոցի պատշգամբում, որից բացվում է Դիոկղետիանոսի բաղնիքների տեսարանը: Հյուրանոցում նա միաժամանակ կբացի իր պատվին կոչված լյուքսը։
Այդ առիթով Լորենին կհագցնի նրա ընկերն ու սիրելի կուտյուրյե Ջորջո Արմանին։
Իտալիայի գլխավոր թերթերը հրապարակումներ են նվիրել Հոլիվուդի ոսկե դարաշրջանի վերջին կենդանի դերասանուհիներից մեկի՝ Լորենի երկարամյա կարիերային։
Իր կարիերայի ընթացքում Լորենը խաղացել է այն ժամանակվա մեծագույն դերասանների հետ՝ Էնթոնի Քուինից և Քլարկ Գեյբլից մինչև Մարլոն Բրանդոն, Քերի Գրանտը, Փիթեր Սելլերսը, Ջոն Ուեյնը և Ֆրենք Սինատրան։
La Repubblica պարբերականը նրա ծննդյան տարեդարձը համեմատել է Բրիջիթ Բարդոյի ծննդյան օրվա հետ, որը սեպտեմբերի 28-ին կնշի իր 90-ամյակը։ «Վեհապանծ իննսուն տարեկաններ», – գրում է պարբերականը ՝ հայտարարելով, որ դուետը «նախասահմանել է 20-րդ դարի կանացի երևակայությունը»:
Լորենի 90-ամյակը միաժամանակ կնշվի հետահայաց ֆիլմերի ցուցադրությամբ Նյու Յորքի Լինքոլն կենտրոնում:
Իտալական հանրային հեռարձակող Rai-ն ծրագրել է իր ֆիլմերի մի քանի կրկնություններ, այդ թվում՝ «Ամուսնության իտալական ձևով» ժապավենի վերականգնված տարբերակը, որտեղ Սոֆի Լորենի խաղընկերն է նրա սիրելի գործընկերը՝ 1996 թվականին մահկանացուն կնքած Մարչելլո Մաստրոյանին:
2007 թվականին ամուսնու՝ կինոպրոդյուսեր Կառլո Պոնտիի մահից հետո այրիանալով՝ Լորենը 2010 թվականին վերադարձավ իտալական հեռուստատեսություն՝ իր կենսագրական ֆիլմով, որտեղ լեգենդար դերասանուհին մարմնավորում էր իր մորը։
2014 թվականին, երբ Լորենը նշում էր իր 80-ամյակը, հրատարակեց իր հուշերը՝ «Երեկ, այսօր, վաղը» խորագրով։
Սոֆի Լորենի վերջին ֆիլմը հայտնվել է 2020 թվականին իր որդու՝ Էդոարդո Պոնտիի նկարահանած «Կյանքն առջևում է» ֆիլմում։
«Ծերությունն ինձ համար խնդիր չէ։ Ես դեռ հարյուր տարեկան չեմ, չէ՞։ Էլ չասած, որ դերասանուհու կապիտալը նրա մարմինը չէ, այլ խելքը: Ես ինձ նայում եմ իմ երեխաների աչքերով և տեսնում եմ աշխարհի ամենագեղեցիկ կնոջը»,- Reader’s Digest-ին տված հարցազրույցում խոստովանել է Սոֆի Լորենը։
