Երաժշտական աշխարհի լեգենդ Լայոնել Ռիչին ստիպված է եղել ընդհատել իր «Sing A Song All Night Long» համատեղ շրջագայության առաջին համերգը, որը տեղի էր ունենում Մինեսոտայի Grand Casino Arena-ում։ Ինչպես հայտնում են տարբեր աղբյուրներ, այդ թվում՝ The Minnesota Star Tribune-ը, 77-ամյա երգիչը համերգի մեկնարկից մոտ մեկ ժամ անց իրեն վատ է զգացել։
Հանդիսատեսի վկայությամբ՝ «Dancing on the Ceiling» երգի կատարման ժամանակ Ռիչին ստիպված է եղել նստել բեմում՝ նշելով, որ գլխապտույտ է զգում։ Չնայած դրան՝ նա փորձել է շարունակել ելույթը՝ նվագելով «Three Times a Lady» ստեղծագործությունը, սակայն որոշ ժամանակ անց հայտարարել է ընդմիջում, որից հետո այլևս չի վերադարձել բեմ։
Մոտ 40 րոպե սպասելուց հետո Ռիչիի թիմի սաքսոֆոնահար Դինո Սոլդոն դուրս է եկել բեմ և հայտնել հանդիսատեսին, որ համերգը չի շարունակվի։ «Ցավոք, Լայոնելը իրեն լավ չի զգում և չի կարող շարունակել ելույթը։ Լրացուցիչ տեղեկատվությունը կտրամադրվի ավելի ուշ», – հայտարարել է Սոլդոն։
Ներկայումս Ռիչիի ներկայացուցիչները պաշտոնական մեկնաբանություններ չեն տվել արտիստի առողջական վիճակի կամ շրջագայության հետագա ճակատագրի վերաբերյալ։ 26-քաղաքանոց շրջագայությունը, որը նա իրականացնում է Earth, Wind & Fire խմբի հետ համատեղ, նախատեսված է շարունակել հաջորդ ելույթով Չիկագոյում, սակայն դեռևս պարզ չէ, թե արդյոք այս միջադեպը կազդի ժամանակացույցի վրա։