ԳԱԼԱ-ն գրում է.
Տավուշի մարզում Բերդ քաղաքում տներից մեկում այսօր կեսօրին հայտնաբերվել է երկու քաղաքացու դի, նրանք մայր ու որդի են:
Ըստ նախնական տեղեկությունների՝ արտաքին զննությամբ՝ քաղաքացիների պարանոցները կտրված են: Նրանց հայտնաբերել են հարևանները և դիմել իրավապահներին:
ԳԱԼԱ-ին որոշակի մանրամասներ է ներկայացրել համայնքապետ Հարություն Մանուչարյանը:
Վերջինս փոխանցեց, որ սպանվածները Դարբինյաններն են: Որդին՝ Հրաչ Դարբինյանն է 1961 թ-ի ծնված, ով Բերդում հայտնի է, որպես աշխատող, խելոք մարդ: Մայրը՝ 80-ամյա Արուսյակ Դարբինյանը եւս համեստ կենցաղավարությամբ է աչքի ընկել:
Համայնքապետն ասաց, որ տեղի ունեցած ոճրագործությունը առայժմ որեւէ ենթադրության հիմք չի տալիս:
Որոշ լրատվականներ հրապարակել էին, որ տեղի ունեցածը կարող է անձնական վրեժխնդրության արդյունք լինել:
ArmLur.am-ը տեղեկություններ էր հրապարակել, որ դեպքի վայրում գրություն է հայտնաբերվել, որում գրված է եղել. «Ես սա արել եմ վրեժխնդրությունից դրդված, քանի որ նա շատ մարդկանց է բռնաբարել»:
Բերդի համայնքապետը սակայն, ասաց, որ նման տեղեկություն իրեն հայտնի չէ.
«Րոպեներ առաջ եմ խոսել տեղի միլպետի հետ, նման բան չի ասում: Ես անձամբ ճանաչում եմ, քաղաքը փոքր քաղաք է, բոլորս ենք ճանաչում: Եթե նման բան լիներ, մենք կիմանայինք: տաքսու վարորդ էր Դարբինյան Հրաչը, նման բան չենք լսել»:
Բերդի համայնքապետ Հարություն Մանուչարյանին հարցրինք նաեւ, թե հնարավոր է ադրբեջանական հետք լինի այստեղ: Պատասխանը հետեւյալն էր.
«Այդ հարցով ավելի շատ զինվորականները ձեզ կպատասխանեն, հակահետախուզության բաժնի պետը»:
