2025 թվականը նշանավորվեց կարմրուկի կրկնվող տարածմամբ Միացյալ Նահանգներում։ Մի ժամանակ հանրային առողջապահական մեծ նվաճում համարվող կարմրուկի վերացումը, այս տարի վերածվեց մտահոգիչ նոր իրականության։ Վարակն ակտիվորեն տարածվեց այն տարածաշրջաններում, որտեղ պատվաստման մակարդակը նվազել էր։
Հատկապես ծանր իրավիճակ ստեղծվեց Հարավային Կարոլինայում՝ պատվաստումից խուսափող համայնքներում։ Այստեղ արձանագրվել է 111 դեպք, որոնցից 105-ը՝ ոչ պատվաստված անձանց մոտ։ Պաշտոնյաները կրկին հորդորում են պատվաստվել՝ ընդգծելով, որ ՄՊԿ (կարմրուկ, պարոտիտ, կարմրախտ) պատվաստանյութի երկու դոզան ապահովում է մոտ 97 տոկոս պաշտպանություն։ Վարակը տարածվել է նաև դպրոցներում, բուժհաստատություններում և եկեղեցական միջոցառումներում։
Նյու Ջերսիի Նյուարկ օդանավակայանում դեկտեմբերի ընթացքում վարակված ուղևորի պատճառով տասնյակ մարդիկ կարող էին ենթարկվել կարմրուկի։ Իշխանությունները զգուշացնում են՝ պատվաստումից հրաժարվելը ոչ միայն մեծացնում է հիվանդանալու ռիսկը, այլ նաև նպաստում է համաճարակային իրավիճակների կրկնությանը։ Այս տարվա ընթացքում ԱՄՆ-ում արձանագրվել է ավելի քան 1300 դեպք, 47 բռնկում և 3 մահվան դեպք, որոնցից երկուսը՝ երեխաների մոտ։