«Մանչեսթեր Յունայթեդը» սկզբունքային համաձայնություն է ձեռք բերել Մայքլ Քերիքին մինչև 2025-26 մրցաշրջանի ավարտը որպես ժամանակավոր գլխավոր մարզիչ նշանակելու վերաբերյալ։ Այս որոշումը կայացվել է Ռուբեն Ամորիմի պաշտոնանկությունից հետո և Մանչեսթերյան ակումբի համար շրջադարձային պահին։ Քերիքի պաշտոնական նշանակումն ակնկալվում է մոտ ապագայում, քանի որ մանրամասները դեռևս վերջնական տեսքի են բերվում։
Անգլիացի մասնագետի համար առաջին խաղը լինելու է շատ կարևոր դիմակայություն՝ «Մանչեսթեր Սիթիի» դեմ մրցաշրջանի առաջիկա շաբաթ օրը «Օլդ Թրաֆորդ» մարզադաշտում։ Նրա մարզչական շտաբում կներգրավվեն Սթիվ Հոլանդը, Ջոնաթան Վուդգեյթը, Ջոնի Էվանսը և Մ-21 թիմի մարզիչ Թրևիս Բինիոնը։ Այս նշանակումը ղեկավարել են ֆուտբոլային տնօրեն Ջեյսոն Ուիլքոքսը և գլխավոր գործադիր տնօրեն Օմար Բերրադան՝ ստանալով համասեփականատեր Սըր Ջիմ Ռեթքլիֆի և Գլեյզերների ընտանիքի հավանությունը։ Դարեն Ֆլեչերը, ով ղեկավարում էր թիմը Ամորիմի հեռացումից հետո երկու խաղում, ակնկալվում է վերադառնալ Մ-18 թիմի հետ իր դերին:
Քերիքը «Մանչեսթեր Յունայթեդի» մարզչական շտաբի անդամ է եղել դեռևս Ժոզե Մոուրինյոյի և Օլե Գունար Սուլշերի օրոք, իսկ 2021 թվականի աշնանը երեք խաղում հանդես է եկել որպես ժամանակավոր մարզիչ՝ գրանցելով երկու հաղթանակ և մեկ ոչ-ոքի։ Նա ակումբից հեռացել է Ռալֆ Ռանգնիկի նշանակումից հետո։ 2022 թվականի հոկտեմբերից մինչև 2025 թվականի հունիսը Քերիքը գլխավորել է «Միդլսբրոյին»՝ Չեմպիոնշիփում թիմին 21-րդ տեղից բարձրացնելով մինչև 4-րդ տեղ իր առաջին մրցաշրջանում։ Սակայն 2024-25 մրցաշրջանում 10-րդ տեղը զբաղեցնելուց հետո նա ազատվել է պաշտոնից։ Որպես ֆուտբոլիստ՝ Քերիքը «Մանչեսթեր Յունայթեդի» կազմում անցկացրել է 464 հանդիպում՝ նվաճելով հինգ Պրեմիեր լիգայի տիտղոս և մեկ Չեմպիոնների լիգայի գավաթ։ Ներկայումս «Յունայթեդը» Պրեմիեր լիգայում 7-րդն է՝ 11 միավորով և հինգ հորիզոնականով հետ մնալով «Սիթիից»: