Մայլի Սայրուսը պաշտոնապես հաստատել է իր կարիերայի վաղ շրջանի մասին տարածված վաղեմի լուրերը՝ բացահայտելով, որ «Դիսնեյ» ալիքի աստղ Դիլան Սպրոուսի հետ սիրավեպ է ունեցել։ Այս մասին երգչուհին պատմել է «Հաննա Մոնտանա» հեռուստասերիալի 20-ամյակին նվիրված հատուկ թողարկման ժամանակ, որը եթեր է հեռարձակվել մարտի 24-ին։
33-ամյա Սայրուսը հաղորդավար Ալեքս Կուպերի հետ զրույցում անկեղծացել է, որ Դիլան Սպրոուսն իր ընկերն է եղել այն ժամանակ, երբ երկուսն էլ նկարահանվում էին հայտնի հեռուստանախագծերում։ «Դիլան Սպրոուսն իմ ընկերն էր։ Դա ճշմարտություն է, հաստատված է»,- ասել է նա՝ հավելելով, որ Սպրոուսը եղել է իր վաղեմի համակրանքը։ Սայրուսը նաև հիշել է, որ այդ ժամանակ իրենց հաճախ էր ուղեկցում Դիլանի հայրը, և հարաբերությունները բավականին ջերմ են եղել։
Այս բացահայտումը կրկին ուշադրություն է հրավիրել 2000-ականների կեսերի «Դիսնեյի» աստղերի կյանքի և նրանց հարաբերությունների վրա։ Սայրուսը նշել է, որ ներկայումս բոլորը շարժվում են առաջ. ինքը նշանված է երաժիշտ Մաքս Մորանդոյի հետ, իսկ Դիլան Սպրոուսն ամուսնացած է մոդել Բարբարա Փալվինի հետ։ Երգչուհին ընդգծել է, որ անցյալի հանդեպ ոչ մի դժգոհություն չունի, և բոլորը վաղուց անցել են առաջ։