fbpx
Իրավական

Ովքե՞ր են Քանաքեռում սպանվածները․ Ոստիկանությունը մանրամասներ է հայտնել (ՏԵՍԱՆՅՈւԹ)

Ինչպես արդեն հայտնի էր դարձել, այս գիշեր Քանաքեռում կրակոցներ են հնչել, որի արդյունքում կան սպանվածներ։

Ոստիկանությունը որոշ մանրամասներ է ներկայացրել դեպքից։

«Նոյեմբերի լույս 11-ի գիշերը, ժամը 2։45-ից սկսած, մայրաքաղաքի տարբեր բժշկական կենտրոններից ոստիկանության Քանաքեռ-Զեյթունի բաժին ահազանգեր են ստացվել, որ հրազենային տարբեր վնասվածքներով հոսպիտալացվել է 6 անձ։

Նրանցից 61-ամյա Արտուշ Սիմոնյանն ու 38-ամյա Արթուր Բորյանը, գիտակցության չգալով, մահացել են։

Հիվանդանոցներ մեկնած օպերատիվ խմբերը պարզել են, որ տղամարդիկ վնասվածքները ստացել են սպանվածներից Արտուշ Սիմոնյանի՝ Քանաքեռի 16-րդ փողոցի թիվ 16 տանը։

Դեպքի վայր մեկնած ոստիկանության, քննչական կոմիտեի և դատախազության ծառայողները հիշյալ տանը հայտնաբերեցին տարբեր տեսակի հրազեններ՝ 4 ատրճանակ, երկու ինքնաձիգ, 4 տասնյակից ավելի պարկուճ, արնանման հետքեր և այլն։ Տան բակում տղամարդկանց դիեր կային։ Պարզվեց ինքնությունը՝ 43-ամյա Արթուր Ղազարյան ու 37-ամյա Արայիկ Խաչատրյան։ Նրանք ստացել էին կյանքի հետ անհամատեղելի հրազենային վնասվածքներ։

Ձեռնարկվում են օպերատիվ-հետախուզական ծավալուն միջոցառումներ ու քննչական գործողություններ՝ դեպքի հանգամանքները պարզելու ուղղությամբ։ Կատարվում է նախաքննություն», – ասված է Ոստիկանության տարածած հաղորդագրությունում։

Ըստ ամենայնի, Արթուր Ղազարյանը «Քանաքեռցի Տույ» մականունով հայտնի քրեական հեղինակությունն է, իսկ Արտուշ Սիմոնյանը ԱԺ նախկին պատգամավոր է, որը հայտնի էր «Քանաքեռցի Արտյուշ» մականունով։

ԱՄԵՆԱԴԻՏՎԱԾՆԵՐԸ

ՎԵՐ