Սինգապուրի վարչապետ Լոուրենս Վոնգը ապրիլի 9-ին զգուշացրել է, որ ժամանակակից պատերազմներում ռազմական բարդ և թանկարժեք համակարգերը խոցելի են դառնում էժանագին անօդաչու թռչող սարքերի «հորդաների» դեմ։ Մանդայ Հիլ ճամբարում ունեցած իր ելույթում Վոնգը նշել է, որ գլոբալ անկայունության պայմաններում Սինգապուրի զինված ուժերը պետք է արմատապես վերանայեն իրենց պաշտպանական ռազմավարությունը՝ հաշվի առնելով տնտեսական և ռազմատեխնիկական նոր իրողությունները։
Վարչապետի խոսքով՝ Ուկրաինայում և Իրանում տեղի ունեցող հակամարտությունները ցույց են տալիս, որ պատերազմի բնույթը փոխվում է, և երկրներն ավելի հաճախ են դիմում ուժի կիրառման։ Սինգապուրի պաշտպանության նախարար Չան Չուն Սինգի հետ միասին Վոնգը դիտարկել է, թե ինչպես են ցամաքային, օդային և թվային ուժերը ինտեգրվում մեկ միասնական համակարգում՝ սպառնալիքներին արագ արձագանքելու համար։ Այս նպատակով Սինգապուրը կիրառում է արհեստական բանականություն՝ մեկ օպերատորի կողմից հարյուրավոր անօդաչուներ կառավարելու և թիրախները ավտոմատ դասակարգելու համար։
Վարչապետն ընդգծել է, որ Սինգապուրի համար կարևոր է ոչ միայն նոր տեխնիկա գնելը, այլև եղած ռեսուրսները ճկուն կերպով օգտագործելը՝ դիմակայելու համար այն ագրեսորներին, որոնք հույսը դնում են զանգվածային և էժան սպառազինության վրա։