Ինչպես պարզել է «Հետքի» հետաքննությունը՝ 2024 թվականի նոյեմբերի 1-ից մինչև 2025 թվականի նոյեմբերի 1-ն ընկած ժամանակահատվածում պարեկային ծառայության տրանսպորտային միջոցների մասնակցությամբ գրանցվել է 446 պատահար։ Դրանցից 175-ը գրանցվել են Երևանում, իսկ 271-ը՝ մարզերում։ Սա նշանակում է, որ միջինում ամեն օր պարեկային ծառայության մեկ մեքենա վթարվում է։ Նախորդ տարվա համեմատությամբ պատահարների թիվն աճել է։
Պատահարների հետևանքով տարբեր աստիճանի մարմնական վնասվածքներ են ստացել 9 պարեկային ծառայող և 8 քաղաքացիական անձ։ Արձանագրված 354 պատահարներից 90-ում մեղավորը եղել է պարեկային ծառայության վարորդը, իսկ 7 դեպքերում՝ մեղավորներից մեկը։ Այսպիսով, ամեն չորրորդ վթարի մեղավորը պարեկային ծառայության աշխատակիցներն են։
Վնասված մեքենաների նորոգումը կատարվում է լիցենզավորված կազմակերպություններում՝ ապահովագրական ընկերությունների հատուցումների միջոցով։ Նախորդ տարվա ընթացքում ապահովագրական ընկերությունները հատուցել են 142.8 միլիոն դրամ վնասի փոխհատուցում։