Reuters-ի հաղորդմամբ՝ ԱՄՆ պետքարտուղար Մայք Պոմպեոն խիստ անհանգստացած է գերմանացի բժշկական փորձագետների նախնական եզրակացությունների վերաբերյալ լուրերից այն մասին, որ ռուսական ընդդիմության ակտիվիստ Ալեքսեյ Նավալնիին թունավորել են:
«Եթե եզրահանգումները ճշգրիտ լինեն, Միացյալ Նահանգները կաջակցի համապարփակ հետաքննություն անցկացնելու ԵՄ-ի կոչին և պատրաստ կլինի օգնել այդ ջանքերին:
Պարոն Նավալնու ընտանիքը և ռուս ժողովուրդը արժանի են, որպեսզի լիարժեք և թափանցիկ հետաքննություն անցկացվի, և դրա մասնակիցները պատասխանատվության ենթարկվեն»,- նշել է Պոմպեոն։
ԱՄՆ պետքարտուղարը հավելել է, որ անհանգստացած է Նավալնիի ընտանիքի համար։
Մինչ այս հայտնել էինք, որ Բեռլինի «Շարիտո» հիվանդանոցը, ուր տեղափոխել են ռուս քաղաքական գործիչ Ալեքսեյ Նավալնիին, հայտարարել է, որ ըստ կլինիկական հետազոտությունների արդյունքների՝ Նավալնին թունավորվել է խոլինէսթերազի արգելակիչների խմբի նյութով։
Հիվանդանոցի տարածած հաղորդագրությունում նշվում է, որ Ալեքսեյ Նավալնին գտնվում է արհեստական կոմայի մեջ, նրա վիճակը գնահատվում է ծանր, սակայն կյանքին լուրջ սպառնալիք չկա։ Նավալնիին բուժում են ատրոպին դեղամիջոցով։
Հիշեցնենք, որ քաղաքական գործչի ինքնազգացողությունը վատացել էր Տոմսկից Մոսկվա ուղևորվող ինքնաթիռում, որն արտակարգ վայրէջք էր կատարել Օմսկում։ 2 օր Օմսկի հիվանդանոցում մնալուց հետո Նավալնիին տեղափոխել են Բեռլին։ ։