Ուկրաինայի իշխանությունները հաղորդել են, որ Ռուսաստանը հարվածներ է հասցրել մի քանի բնակելի շենքերի Կրիվոյ Ռոգում՝ Ուկրաինայի նախագահ Վլադիմիր Զելենսկիի հայրենի քաղաքում: Այս մասին հաղորդում BBC-ն՝ վկայակոչելով նահանգապետին:
Նշվում է, որ Կրիվոյ Ռոգի 5-հարկանի բնակելի շենքի գնդակոծության հետևանքով 3 մարդ է զոհվել, 25-ը՝ վիրավորվել:
Տեղի իշխանությունները հաղորդել են նաև այլ քաղաքների գնդակոծությունների մասին: Ըստ Խարկովի քաղաքապետ Իգոր Տերեխովի՝ Խարկովում գիշերն անօդաչու թռչող սարքերի հարձակման տակ են հայտնվել քաղաքացիական շենքեր, վնասվել է կոմունալ ծառայություններ մատուցող ընկերության շենքը և մեկ պահեստ:
Կիևում, ըստ հաղորդումների, հակաօդային պաշտպանության համակարգերին հաջողվել է հետ մղել օդային հարձակումները:
Ռուսական կողմից ևս հայտնել են ուկրաինական զորքերի հասցրած հարվածների մասին:
ՌԴ Կուրսկի մարզի նահանգապետն իր Telegram ալիքում հայտնել է, որ վաղ առավոտյան գնդակոծության տակ են հայտնվել Գլուշկովո և Տետկինո բնակավայրերը, վնասվել են 10-ից ավելի բնակելի տներ, մի քանի վարչական շենքեր, 2 մեքենա: Տուժածներ չկան:
Իսկ Դոնեցկի իշխանությունները հայտնել են Ուկրաինայի զինված ուժերի կողմից քաղաքի երկու շրջանի գնդակոծության մասին: ТАСС գործակալության փոխանցմամբ՝ գնդակոծվել է նաև Դոնեցկի Ժողովրդական Հանրապետության Ստարոմիխայլովկա բնակավայրը:
![](https://azat.tv/wp-content/uploads/2022/09/azattvlogoblack.png)