ԱՄՆ բարձրաստիճան պաշտոնյաները Նյու Յորքում հանդիպել են իրանական պատվիրակության հետ

ԱՄՆ նախագահ Դոնալդ Թրամփը հաստատել է, որ իր վարչակազմի բարձրաստիճան ներկայացուցիչները՝ հատուկ բանագնաց Սթիվ Ուիթքոֆը և Ջարեդ Քուշները, Նյու Յորքում եռաժամյա բանակցություններ են վարել իրանական պատվիրակության հետ։ Այս մասին հայտնում է Israel Hayom-ը՝ նշելով, որ հանդիպումը տեղի է ունեցել ՄԱԿ-ի Գլխավոր ասամբլեայի 81-րդ նստաշրջանում Թրամփի ելույթից անմիջապես հետո, թեև ավելի վաղ վարչակազմը հերքում էր հանդիպման հավանականությունը։

Բանակցություններին մասնակցել է Իրանի արտաքին գործերի նախարար Աբաս Արաղչին։ Ըստ աղբյուրի՝ հանդիպմանը ներկա է եղել նաև Կատարի վարչապետ և ԱԳ նախարար շեյխ Մուհամմադ բին Աբդուլռահման Ալ Թանին, ով միջնորդի դեր է ստանձնել։ Օրակարգի առանցքում եղել են բանակցությունների վերսկսման պայմանները, մասնավորապես՝ Հորմուզի նեղուցի շուրջ ստեղծված իրավիճակը։

Թրամփը հանդիպումը որակել է «շատ արդյունավետ»՝ ընդգծելով, որ թեև հիմնական վեճերի շուրջ համաձայնություն ձեռք չի բերվել, կողմերը պայմանավորվել են առաջիկա օրերին անցկացնել հաջորդ հանդիպումը։ ՄԱԿ-ում իր ելույթի ժամանակ ԱՄՆ նախագահը Թեհրանին կոչ է արել ընտրություն կատարել միջուկային ծրագրի դադարեցման և ահաբեկչությանը աջակցելուց հրաժարվելու, կամ ԱՄՆ ռազմական պատասխան գործողությունների միջև։