ՆԱՏՕ-ի անդամներ Միացյալ Նահանգների և Թուրքիայի հարաբերություններում նոր լարվածություն է առաջացել:
Երկու դաշնակիցները միմյանց մեղադրում են Սիրիայի հարցով երկկողմ քննարկումների արդյունքները տարբեր տեսանկյուններից մեկնաբանելու համար:
Բացի դրանից` Վաշինգտոնը և Անկարան իրարամերժ մոտեցումներ ունեն ռուսական արտադրության C-400 (S-400) հրթիռային համակարգեր գնելու Թուրքիայի մտադրության վերաբերյալ:
Ամերիկացիները և թուրքերը չեն համաձայնեցրել այդ հարցով աշխատանքային խումբ ստեղծելու առաջարկը: Միացյալ Նահանգները և ՆԱՏՕ-ի մի շարք այլ անդամներ կտրականապես դեմ են Անկարայի և Մոսկվայի այդ գործարքին:
Թուրքիան խստորեն քննադատել է ՆԱՏՕ-ի հիմնադրման 70-ամյակի կապակցությամբ Վաշինգտոնում տեղի ունեցած հանդիսավոր հավաքի ընթացքում պետքարտուղար Մայք Պոմպեոյի և արտգործնախարար Մևլութ Չավուշօղլուի հանդիպման մասին պետական դեպարտամենտի մեկնաբանությունը:
Ըստ պետական դեպարտամենտի` Պոմպեոն ասել է․ «Անկարային սպառնում են աղետալի հետևանքներ այն դեպքում, եթե թուրքերն ավարտին հասցնեն ռուսական հրթիռները գնելու գործարքը, կամ սկսեն նոր գրոհներ Սիրիայում»:
Պոմպեոն նաև պահանջել է Անկարայից «արագ լուծել Թուրքիայում ապօրինաբար կալանավորված ԱՄՆ քաղաքացիների հարցը»: