Հայաստանն ու Ռուսաստանը համագործակցության մասին նոր համաձայնագիր են պատրաստում։ Ռուսաստանի արտգործնախարար Սերգեյ Լավրովն այս մասին ասաց ուղիղ եթերում` պատասխանելով «Կոմսոմոլսկայա պրավդա» թերթի թղթակիցների ու ընթերցողների հարցերին։
Անդրադառնալով հետխորհրդային երկրներում կենսալաբորատորիաների գործունեությանը` լրագրող Դարյա Ասլանովան հարցրեց արտգործնախարարին` ինչպե՞ս է Ռուսաստանը պատրաստվում լուծել Հայաստանում ու Վրաստանում արտասահմանյան լաբորատորիաների գոյության ու ակտիվ գործունեության խնդիրը։
«Մոսկվան ու Երևանը կստորագրեն մի փաստաթուղթ, որը կերաշխավորի Հայաստանում արտասահմանցի զինվորականների բացակայությունը», – նշեց Լավրովը։
Նախարարը կարծում է, որ դա թույլ կտա կենսալաբորատորիաների աշխատանքն ավելի թափանցիկ դարձնել։
Նրա խոսքով` թեև Հայաստանն ու Վրաստանը ռուս դիվանագետների համար ազատ մուտք են բացել դեպի լաբորատորիաներ, այնտեղ պետք է ստուգումներ իրականացնեն մասնագետները, այլ ոչ թե գերատեսչությունների ներկայացուցիչները։
Կենսալաբորատորիաների հետ կապված իրարանցումը նոր թափ ստացավ Վրաստանի պետանվտանգության նախկին նախարար Իգոր Գիորգաձեի այն հայտարարությունից հետո, թե Լուգարի լաբորատորիայում վտանգավոր փորձեր են անցկացնում մարդկանց վրա։ Ռեֆերենս լաբորատորիաները գործում են հետխորհրդային մի քանի երկրներում. 2010 թվականից` Ուկրաինայում, 2011 թվականից` Վրաստանում, իսկ 2016 թվականից` Ղազախստանում, Հայաստանում, Ադրբեջանում ու Ուզբեկստանում։
Դրանից հետո ՀՀ վարչապետի պաշտոնակատար Նիկոլ Փաշինյանի խորհրդական Արսեն Գասպարյանն ասել էր, որ այս տարվա օգոստոսին Ռուսաստանի պաշտպանության նախարարության ներկայացուցիչների համար այցելություններ էր կազմակերպվել Երևանում և Գյումրիում գործող լաբորատորիաներ։
![](https://azat.tv/wp-content/uploads/2022/09/azattvlogoblack.png)