60 կգ քաշային հունահռոմեական ոճի ըմբիշ Սահակ Հովհաննիսյանը դարձավ աշխարհի երիտասարդական առաջնության արծաթե մեդալակիր։
Էստոնիայի մայրաքաղաք Տալինում ընթացող ըմբշամարտի աշխարհի երիտասարդական առաջնության եզրափակչում Սահակ Հովհաննիսյանը գոտեմարտեց թուրք Քերեմ Քամալի հետ և 2-7 հաշվով պարտություն կրեց։
Նշենք, որ մինչև եզրափակիչ Սահակ Հովհաննիսյանը մրցակիցներին ոչ մի միավոր չէր զիջել։ Հովհաննիսյանը պայքարը սկսել էր որակավորման փուլից, որտեղ 9-0 հաշվով հաղթել էր Շվեյցարիան ներկայացնող Ռասուլ Իսրապիլովին։
1/8 եզրափակչում Սահակը նույն հաշվով հաղթել էր հնդիկ Սաչին Ռանային, քառորդ եզրափակչում 5-0 հաշվով պարտության էր մատնել Եվրոպայի առաջնության չեմպիոն վրացի Դիեգո Չխիկվաձեին, իսկ կիսաեզրափակչում մեր ըմբիշը 6-0 հաշվով առավելության էր հասել ռուս Գեորգի Տիբիլովի նկատմամբ։
Հավելենք, որ այսօր աշխարհի երիտասարդական առաջնության չեմպիոնի կոչման համար պայքարելու է նաև 67 կգ քաշային Շանթ Խաչատրյանը։
https://streamable.com/szlv2
