Ֆրանսիայի Հանրապետության նախագահ
Էմանուել Մակրոնին
«ԲԱՑՈՒՄ» քաղաքացիական
նախաձեռնությունից
Ուղերձ
Հարգելի՛ նախագահ Մակրոն,
Ձեզ, որպես խաղաղության, մարդու իրավունքների և միջազգային իրավունքի սկզբունքների պահպանմանը նվիրված առաջնորդի, «ԲԱՑՈՒՄ» քաղաքացիական նախաձեռնությունը հրատապ կոչ է անում Ձեր հարգարժան առաջնորդությամբ հրավիրել Միավորված Ազգերի Կազմակերպության Անվտանգության խորհրդի անհապաղ նիստ: Արցախում (Լեռնային Ղարաբաղի Հանրապետությունում) իրավիճակի հրատապությունը պահանջում է միջազգային վճռական գործողություններ։
Մենք խորապես գնահատում ենք Ձեր հստակ դիրքորոշումն այս հարցում, ինչպես արտահայտված է Ձեր վերջին մեկնաբանություններում: Ձեր պնդումը, որ «այլևս դիվանագիտության ժամանակը չէ», ընդգծում է ծանր իրավիճակը բեկելու կոնկրետ քայլերի հրատապ անհրաժեշտությունը։
Հաշվի առնելով հումանիտար գործողություններին Ձեր նվիրվածությունը և խաղաղությանն ու մեր ժողովուրդների անվտանգությանը Ձեր անառարկելի աջակցությունը, ինչպես նաև Միավորված Ազգերի Կազմակերպության առաքելությանը և Ֆրանսիայի կողմից հաստատված բարձր արժեքներն ու սկզբունքները՝ մենք կոչ ենք անում ընդունել վճռական բանաձև, որը կանդրադառնա հետևյալ կենսական կետերին.
մարդասիրական օգնության փոխանցում. իրականացնել մարդասիրական օգնության անհապաղ առաքումը Բերձորի (Լաչին) միջանցքով: Ժամանակին գործողությունները չափազանց կարևոր են հումանիտար իրավիճակի է՛լ ավելի վատթարացումը կանխելու համար։ Հրատապ գործողությունները չափազանց կարեւոր են հումանիտար իրավիճակի է՛լ ավելի վատթարացումը կանխելու համար։ Այլընտրանքային ճանապարհները նսեմացնում են արցախցիների ազատ կամարտահայտումը եւ լեգիտիմացնում Արդբեջանի ու վերջինիս հովանավորների կողմից խաթարված կենսական միջանցքի արգելափակման փաստը՝ հիմնախնդրի էությունը քաղաքականից նենգափոխելով սոսկ հումանիտարի։
Բերձորի միջանցքի բացում եւ անխափանության ապահովում. բացել Բերձորի միջանցքը, որպեսզի ապահովվի Արցախի հայ ժողովրդին անհրաժեշտ մարդասիրական օգնության առաքումը, ստեղծելով երաշխիքներ դրա հետագա անխափան գործունեության համար: Այս փրկօղակը էական նշանակություն ունի հայության տառապանքը թեթևացնելու և բնակչության հիմնական կարիքները բավարարելու համար:
պատասխանատվության հաստատում. վկայակոչելով «Ցեղասպանության հանցագործությունը կանխարգելելու եւ պատժելու մասին» ՄԱԿ 1948թ. դեկտեմբերի 9-ի կոնվենցիան՝ Ադրբեջանի ղեկավարությանը և նրա հանցակիցներին պատասխանատվության ենթարկել Արցախի հայ ժողովրդին ցեղասպանության ենթարկելու համար: Միջազգային հանրությունը պետք է համախմբված լինի նման զազրելի խախտումների և խոշտանգումների դեմ։
խախտված իրավունքների վերականգնում. հաստատել Արցախի հայ ժողովրդի իրավունքները, ներառյալ նրա կյանքի ու քաղաքական ինքնորոշման անքակտելի իրավունքը։ Այս հիմնաքարային սկզբունքը որպես միջազգային իրավունքի հիմնարար սկզբունք՝ պետք է ճանաչվի և հարգվի։
Արցախի հայ ժողովուրդը կանգնած է Ադրբեջանի և իր հովանավորների կողմից աննախադեպ սովի ու շրջափակման միջոցով ահաբեկման, ազատ կամքի հպատակեցման, հայրենազրկման ու ցեղասպանության մարտահրավերների առաջ։ Ձեր նվիրումը մարդկության բարեկեցությանը և անվտանգությանը հույսի փարոս է։ Մենք կոչ ենք անում Ձեզ շարունակել անգնահատելի ջանքեր ներդնել հանուն միջազգային միասնականության՝ Արցախի հայ ժողովրդին մարդասիրական օգնության տրամադրման, իրավունքների, ինքնիշխանության և արժանապատվության պաշտպանության գործում։
Հարգանքներով՝
«Բացում» քաղաքացիական շարժման համակարգողներ
#ԲԱՑՈՒՄ #ԱրցախՔեզՀետԵնք
