Կառավարության այսօրվա նիստում ընդունվել է որոշում երկարաձգել թոշակի անցած զինծառայողներին բնակարանային աջակցության տրամադրման ծրագիրը ևս երկու տարով՝ մինչև 2026 թվականի դեկտեմբեր։ Ծրագիրը նպատակ ունի ապահովել ՊՆ համակարգի այն նախկին զինծառայողներին, ովքեր զինվորական ծառայության ընթացքում չեն ստացել անհատույց բնակարան, սակայն կարիք են ունեցել բնակարանային պայմանների բարելավման։
Ծրագիրը գործում է 2019 թվականից և ֆինանսավորվում է ՊՆ անվամբ բացված արտաբյուջետային ավանդային հաշվից։ Մինչ օրս ծրագրի համար հատկացվել է 5.7 միլիարդ դրամ, որից 4.78 միլիարդ դրամը ուղղվել է 564 ընտանիքի բնակարանային աջակցությանը։ 2024թ. սեպտեմբերի 10-ի դրությամբ շահառուների ցուցակում ներառված էր 702 ընտանիք, որոնցից 344-ը՝ Երևանում։
Ըստ կառավարության տվյալների՝ ծրագրի շրջանակում մնում է 921.7 միլիոն դրամի ֆինանսական մնացորդ, որը կօգտագործվի հավելյալ շահառուների աջակցման նպատակով։ Բացի այդ, բնակարանի գնման վկայագրեր տրամադրվել են 93 շահառուների, որոնց համար մարման ժամկետը սահմանվել է 1 տարի։
Որոշմամբ ծրագիրը թույլ կտա շարունակել աջակցություն տրամադրել թե՛ ընթացիկ շահառուներին, թե՛ նոր դիմում ներկայացնողներին՝ աջակցելով զինծառայության ընթացքում բարդ պայմաններում հայտնված ընտանիքներին բնակարանային հարցերում։
ԽՈՐՀՈւՐԴ Է ՏՐՎՈւՄ ԿԱՐԴԱԼ
