ԱՄՆ նախագահ Դոնալդ Թրամփը և Ճապոնիայի վարչապետ Սինձո Աբեն հեռախոսազրույցի ընթացքում քննարկել են Օմանի ծոցում նավթային լցանավերի վրա ենթադրյալ հարձակումները:
Թրամփը շնորհակալություն է հայտնել Աբեին Իրանի հետ բանակցությունների անցկացմանը նպաստող նրա ջանքերի համար: Զրուցակիցները քննարկել են երկու երկրների առևտրային բանակցությունները և Թրամփի առաջիկա այցը Ճապոնիա «Մեծ Քսանի» գագաթնաժողովի շրջանակներում:
Նախօրեին Օմանի ծոցում ենթադրյալ հարձակումից հետո երկու լցանավերում տեղի են ունեցել պայթյուններ և հրդեհներ. կատարվածի պատճառները ճշտվում են: Ճապոնական Kokuka Courageous լցանավի անձնակազմը տեղափոխվել է ԱՄՆ-ի ռազմածովային ուժերի Bainbridge ավիակիր նավում, իսկ նորվեգական Front Altair լցանավի անձնակամզին, որում եղել են նաև ռուսներ, իրանցի սահմանայինները տարհանել են դեպի իրենց Ջասկ նավահանգիստ:
Նշենք, որ Իրանի հոգևոր առաջնորդ այաթոլա Սեյեդ Ալի Համենեին Ճապոնիայի վարչապետ Սինձո Աբեի հետ Թեհրանում հանդիպման ժամանակ մերժել է բանակցությունների մասին Թրամփի առաջարկը: Աբեն հաղորդել էր Համենեին Ամերիկայի առաջնորդի ուղերձը, սակայն Իրանի հոգևոր առաջնորդը հայտարարել էր, որ Թրամփն արժանի չէ: Նա բացառել էր «Թրամփի նման մարդու հետ» բանակցությունների հավանականությունը:
Աբեի և Համենեիի հետ հանդիպումից մի քանի ժամ անց Թրամփը թվիթերյան գրառում էր կատարել, որ ԱՄՆ-ը և Իրանը պատրաստ չեն գործարք կնքել:
