Դեկտեմբերի 11-ին Ներքին գործերի նախարարության Ոստիկանության Քրեական ոստիկանության գլխավոր վարչության պետ Վարդան Վարդանյանը հանդիպել է ԱՄՆ Թմրամիջոցների դեմ պայքարի վարչակազմի տարածաշրջանային կցորդ Իմեդա Ցիցաշվիլու գլխավորած պատվիրակության հետ։ Հանդիպման ընթացքում վերահաստատվել է Հայաստանի և ԱՄՆ-ի միջև համագործակցության ամրապնդումը՝ թմրամիջոցների ապօրինի շրջանառության դեմ պայքարի ոլորտում։
Վարդան Վարդանյանը կարևորել է ՆԳ նախարարության և ԱՄՆ Թմրամիջոցների դեմ պայքարի վարչակազմի միջև ձևավորված գործընկերությունը՝ ընդգծելով, որ թմրամիջոցների ապօրինի շրջանառության կանխարգելումը նախարարության առաջնահերթություններից մեկն է։
Իմեդա Ցիցաշվիլին իր հերթին գոհունակություն է հայտնել համագործակցության ընթացքի վերաբերյալ՝ նշելով, որ փոխգործակցության հուշագիրը վկայում է ամուր և երկարաժամկետ գործընկերության մասին։ Նա պատրաստակամություն է հայտնել ընդլայնելու համագործակցությունը և խթանելու նոր նախաձեռնություններ։
Հանդիպման ընթացքում քննարկվել են ապօրինի թմրամիջոցների շրջանառության բացահայտման, իրավապահ մարմինների մասնագիտական կարողությունների կատարելագործման և նյութատեխնիկական բազայի հզորացման ուղղությամբ հարցեր։
Համագործակցության շրջանակում նախանշվել են նոր ուղղություններ, որոնք նպատակ ունեն ամրապնդելու փոխգործակցությունը և խթանելու արդյունավետության բարձրացումը՝ թմրամիջոցների դեմ պայքարում։
