ՆՅՈՒ ՅՈՐՔ – Նյու Յորքի նորաձևության շաբաթվանից ընդամենը օրեր առաջ գեղեցկության ոլորտի մասնագետները հավաքվել են Բրուքլինում՝ քննարկելու նորաձևության և կոսմետիկայի ոլորտում սևամորթ դիմահարդարների առջև ծառացած կառուցվածքային, ֆինանսական և ներկայացվածության խնդիրները: «Beauty, Unfiltered» խորագրով քննարկումը կազմակերպել էր Mind Candy Beauty փոդքասթի հիմնադիր Լիրիկ Քրիստիանը՝ դիմահարդար Բրիտանի Ուիթֆիլդին պատկանող WTF Dumbo Studio-ում:
ESSENCE պարբերականի փոխանցմամբ՝ միջոցառմանն ելույթ են ունեցել ոլորտի ճանաչված դիմահարդարներ Էհլի Լունան և Ջալիսա Ջայկարանը: Քննարկման առանցքում եղել են ոչ միայն սեզոնային միտումները, այլև ետնաբեմում տիրող իրական պայմանները, պայմանագրերի կնքման դժվարությունները և աշխատանքային վարձատրության անհավասարությունը:
Ետնաբեմի ճնշումներն ու ներկայացվածության խնդիրը
Նորաձևության շաբաթվա ընթացքում դիմահարդարները ենթարկվում են մեծ ճնշման՝ ձգտելով ստանալ լավագույն պատվերները և պահպանել իրենց տեղը ոլորտում: Լիրիկ Քրիստիանը ESSENCE-ին տված հարցազրույցում նշել է, որ հանրությունը տեսնում է միայն պատրաստի կերպարներն ու ետնաբեմի լուսանկարները, սակայն հազվադեպ է խոսվում այն մարտահրավերների մասին, որոնց միջով անցնում են մասնագետները:
Ջալիսա Ջայկարանն ընդգծել է, որ քանի որ նորաձևության շաբաթը ձևավորում է գեղեցկության համաշխարհային չափանիշները, չափազանց կարևոր է հետևել, թե ովքեր են ղեկավարում ցուցադրությունները և ինչպես է ներկայացված սևամորթ մասնագետների աշխատանքը backstage-ում: Նա հավելել է, որ դիմահարդարման մեջ կարևոր է պահպանել անհատականությունը, այլ ոչ թե կուրորեն հետևել կարճաժամկետ թրենդներին:
Միտումներ, ինքնություն և հետագա ծրագրեր
Խոսելով գալիք սեզոնի թրենդների մասին՝ Էհլի Լունան նշել է հոնքերի ոսկրային հատվածի ընդգծման և դիմափոշու (blush) նոր տեխնիկաների կիրառման մասին, սակայն ընդգծել է, որ սեփական ոճի ընկալումն ավելի կարևոր է, քան ցանկացած թրենդ:
Միջոցառման ընթացքում մասնակիցները քննարկել են նաև մասնագիտական ինքնավստահության պակասի (imposter syndrome) և ոլորտում առկա մրցակցության հարցերը: Mind Candy Beauty-ն հայտարարել է նախաձեռնությունը ընդլայնելու ծրագրերի մասին, այդ թվում՝ Mind Candy Beauty Mentorship Collective կրթական ծրագրի զարգացման և 2027 թվականին սևամորթ տղամարդ դիմահարդարների համար հատուկ ծրագրերի մեկնարկի մասին: