Բոլիվիայի նախկին նախագահ Էվո Մորալեսը մտահոգ է, որ ճգնաժամը երկրում կարող է հանգեցնել քաղաքացիական պատերազմի։ Այս մասին նա ասել է EFE գործակալության հարցազրույցում։
Նրա խոսքով՝ հակամարտության կողմերը պետք է բանակցություններ սկսեն, որ վերջ դրվի բռնությանը։ Նա նաև կոչ է արել Բոլիվիայի իշխանություններին բացել դռները ՄԱԿ-ի, Եվրամիության կամ կաթոլիկ եկեղեցու հետ համագործակցության համար։
«Քանի դեռ մենք էինք իշխանությունը, մենք միավորում էինք քաղաքն ու գյուղը, արևելքն ու արևմուտքը։ Իսկ հիմա խմբեր ե հայտնվել, որոնք բռնություն են հրահրում․ նրանք ավազակախմբերի անդամներ, թմրամոլներ են։ Նրանք թափանցել են անգամ համալսարաններ, և հավաքվում են կիսառազմականացված խմբեր»,-ասել է Մորալեսը։
Էվո Մորալեսը հրաժարական է տվել նոյեմբերի 10-ին Բոլիվիայում սկսված բողոքների ֆոնին։ Բոլիվիայի ղեկավարի ժամանակավոր պարտականությունները ներկայումս ստանձնել է Սենատի փոխխոսնակ Ժանին Անիեսը։