Մեծ Բրիտանիայի նախկին վարչապետ Բորիս Ջոնսոնը ռեպորտաժ է պատրաստել Զապորոժիեի առաջնագծից

Մեծ Բրիտանիայի նախկին վարչապետ Բորիս Ջոնսոնն ավարտել է Ուկրաինա կատարած իր այցը, որի ընթացքում 72 ժամ անցկացրել է Զապորոժիեի մերձակա առաջնագծում։ Այցի նպատակը Channel 5 հեռուստաալիքի «Into Ukraine’s Kill Zone» («Ուկրաինայի մահացու գոտում») վավերագրական ֆիլմի նկարահանումներն էին։

Ինչպես հաղորդում է Oxford Mail-ը, Ջոնսոնը տեղում ծանոթացել է զինվորականների և խաղաղ բնակիչների կյանքին՝ գտնվելով ռուսական անօդաչու թռչող սարքերի, հրետանային և հրթիռային հարվածների մշտական վտանգի տակ։ Նկարահանող խումբը տեղաշարժվել է երկրի ամենավտանգավոր և հաճախակի ռմբակոծվող ճանապարհներից մեկով։ Այս այցը լայն արձագանք է ստացել, հատկապես ուկրաինացի հանդիսատեսի շրջանում, որոնք շնորհակալություն են հայտնել Ջոնսոնին պատերազմի իրական հետևանքները լուսաբանելու համար։

Չնայած անվտանգության վերաբերյալ հնչող մտահոգություններին՝ Բորիս Ջոնսոնը շարունակում է մնալ Ուկրաինայի ակտիվ աջակիցներից։ Ուկրաինայի Անկախության օրվա կապակցությամբ նա հանդես է եկել հայտարարությամբ՝ նշելով, որ ուկրաինացի ժողովուրդը երբեք չի հանձնվելու և կոչ է արել Ռուսաստանի ղեկավարությանը ճանաչել այդ իրողությունը։