Իրավական լուրջ հակամարտություն է հասունանում ԱՄՆ-ում, որն ի ցույց է դնում սթրիմինգային դարաշրջանում մտավոր սեփականության պաշտպանության բարդությունները։ «Hyde Lane Inc.» ընկերությունը, որը ներկայացնում է ամերիկյան հայտնի քրիստոնեական մետալ խումբ «Demon Hunter»-ին, դատական հայց է ներկայացրել մեդիահսկա Netflix-ի և համերգային խոշորագույն պրոմոուտեր «AEG Presents»-ի դեմ։ Կալիֆոռնիայի կենտրոնական շրջանի ԱՄՆ դաշնային դատարան ներկայացված հայցում խումբը մեղադրում է ընկերություններին ապրանքային նշանի իրավունքների խախտման, ծագման կեղծ նշման և անբարեխիղճ մրցակցության մեջ՝ կապված Netflix-ի հանրահայտ «KPop Demon Hunters» անիմացիոն նախագծի հետ։
Ինչպես հաղորդում է Rolling Stone պարբերականը, «Demon Hunter» խումբը հիմնադրվել է 2000 թվականին Սիեթլում՝ եղբայրներ Ռայան և Դոն Քլարկների կողմից։ Ավելի քան քառորդ դար խումբը թողարկել է 12 ստուդիական ալբոմ, որոնցից վերջինը՝ There Was a Light Here-ը, լույս է տեսել 2025 թվականի սեպտեմբերին։ Խումբն ունի ավելի քան 348,000 ամսական ունկնդիր Spotify-ում, իսկ նրանց տեսահոլովակները YouTube-ում միլիոնավոր դիտումներ են հավաքել։ Խմբի շահերը ներկայացնող ընկերությունը դեռևս 2014 թվականին գրանցել էր «Demon Hunter» ապրանքային նշանը կենդանի երաժշտական կատարումների համար՝ փաստացի առևտրային օգտագործումն սկսելով դեռ 2001 թվականից։
Վեճի հիմնական պատճառը. «KPop Demon Hunters»-ի հաջողությունը
Խնդիրներն սկսվեցին այն բանից հետո, երբ Netflix-ը 2025 թվականի հունիսին թողարկեց իր «KPop Demon Hunters» անիմացիոն երաժշտական ֆիլմը։ Այն պատմում է հորինված «Huntrix» K-pop խմբի մասին, որի անդամները գաղտնի պայքարում են գերբնական ուժերի դեմ։ Ֆիլմը դարձավ հսկայական հաջողություն՝ գրանցելով ավելի քան 325 միլիոն դիտում, իսկ դրա սաունդթրեքերը սթրիմինգային հարթակներում հավաքեցին ավելի քան 10 միլիարդ լսում։ 2026 թվականի մարտի 15-ին ֆիլմի գլխավոր երգը՝ «Golden»-ը, արժանացավ «Օսկար» մրցանակի՝ դառնալով պատմության մեջ առաջին K-pop ստեղծագործությունը, որը նման հաջողության է հասել։
Ըստ The Los Angeles Times-ի հաղորդման՝ հակամարտությունը սրվեց, երբ Netflix-ը և AEG Presents-ը 2026 թվականի մայիսին հայտարարեցին նախագծի շրջանակներում համաշխարհային համերգային տուրի, սաունդթրեքերի վաճառքի և լայնածավալ մերչենդայզինգի (ապրանքների վաճառքի) մեկնարկի մասին։ Խումբը պնդում է, որ Netflix-ը փորձում է յուրացնել իրենց ապրանքային նշանը՝ սկսած 2025 թվականի օգոստոսից ԱՄՆ արտոնագրերի և ապրանքային նշանների գրասենյակ (USPTO) ներկայացնելով «KPop Demon Hunters» անվանմամբ 10 տարբեր հայտեր։
«Հակադարձ շփոթության» իրավական դոկտրինը
Դատական հայցի հիմքում ընկած է «հակադարձ շփոթության» (reverse confusion) իրավական հայեցակարգը։ Ի տարբերություն ավանդական դեպքերի, երբ փոքր ընկերությունն է փորձում օգտվել հայտնի բրենդի անունից, հակադարձ շփոթության դեպքում հսկայական ֆինանսական և գովազդային ռեսուրսներ ունեցող նորեկը (տվյալ դեպքում՝ Netflix-ը) շուկան հեղեղում է նմանատիպ անվանմամբ, ինչի հետևանքով սպառողները սկսում են կարծել, թե հին և փոքր բրենդը (մետալ խումբը) պարզապես նոր հսկայի մասնաճյուղն է կամ փորձում է կրկնօրինակել այն։
Հայցվորները պնդում են, որ Netflix-ի միլիոնավոր դոլարների գովազդային արշավը ստվերում է իրենց 25-ամյա գործունեությունը։ Ticketmaster և Google համակարգերում «Demon Hunter» որոնելիս առաջնային հայտնվում են Netflix-ի նախագծի համերգներն ու իրադարձությունները, ինչը խախտում է խմբի իրավունքները շուկայում։
Սպառողների շփոթության ապացույցները
Որպես իրական շփոթության ապացույց՝ հայցում բերվում են կոնկրետ օրինակներ։ Ծնողներից մեկը նամակ է գրել խմբի տնօրինությանը՝ պահանջելով վերադարձնել Նյու Յորքի Ալբանի քաղաքում կայանալիք Demon Hunter-ի համերգի համար վճարված 500 դոլարը։ Ծնողը կարծել էր, թե տոմսերը գնում է իր 5 և 6 տարեկան դուստրերի համար նախատեսված մանկական «KPop Demon Hunters» շոուի համար և միայն ուշ է հասկացել, որ դա ծանր մետալ խմբի համերգ է։
Շփոթության զոհ են դարձել նաև լրատվամիջոցները։ 2026 թվականի մարտի 16-ին՝ «Օսկար» մրցանակաբաշխության հաջորդ օրը, ամերիկյան հայտնի Inside Edition հաղորդման պրոդյուսերը նամակ է գրել մետալ խմբի մենեջեր Ռայան Դաունիին՝ խնդրելով հարցազրույց կազմակերպել երգահան Յու Հան Լիի հետ, ով իրականում Netflix-ի ֆիլմի երգի հեղինակն է և որևէ կապ չունի մետալ խմբի հետ։
Ապրանքային նշանի խոցելիությունը
Դատական գործընթացում կարևոր դեր կարող է խաղալ այն փաստը, որ «Demon Hunter»-ի օրիգինալ ապրանքային նշանը 2025 թվականի փետրվարին տեխնիկական վրիպակի (անհրաժեշտ հայտարարագրերը ժամանակին չներկայացնելու) պատճառով չեղարկվել էր USPTO-ի կողմից։ Խումբը նոր հայտ է ներկայացրել միայն 2025 թվականի դեկտեմբերին։ Այս ընթացքում՝ 2025-ի օգոստոսին, Netflix-ն արդեն ներկայացրել էր իր սեփական հայտերը։ Այնուամենայնիվ, խումբը պնդում է, որ իրենց կողմից անվանման անընդմեջ օգտագործումը 2001 թվականից ի վեր իրենց տալիս է նախապատվության իրավունք (common-law priority)։
Netflix-ի ներկայացուցիչը հայտարարել է, որ մեղադրանքներն անհիմն են, և իրենք պատրաստվում են վճռականորեն պաշտպանել իրենց շահերը դատարանում։