Ուկրաինայի ներկայացրած խաղաղության ծրագրի վերջին տարբերակը ենթադրում է Դոնբասից ռուսական եւ ուկրաինական զորքերի դուրսբերում եւ «ազատ տնտեսական գոտի» ստեղծում տարածաշրջանում։ Այս առաջարկը քննարկվելու է ԱՄՆ, Ուկրաինայի, Ֆրանսիայի, Գերմանիայի եւ Մեծ Բրիտանիայի կողմից։ Միեւնույն ժամանակ, Politico-ի աղբյուրները կասկած են հայտնել, որ Ռուսաստանը կաջակցի այս առաջարկին։
Ուկրաինայի նախագահ Վլադիմիր Զելենսկին նշել է, որ «ազատ տնտեսական գոտի» ստեղծելու գաղափարը բարձրաձայնվել է Միացյալ Նահանգների կողմից։ Նրա խոսքով՝ Վաշինգտոնը տեսնում է փոխզիջում, որի դեպքում ուկրաինական զորքերը դուրս են գալիս այդ տարածքից, իսկ ռուսական զորքերը չեն մտնում։ Սակայն դեռեւս անհասկանալի է, թե ով է կառավարելու այս գոտին։ Զելենսկին ընդգծել է, որ ցանկացած տարածքային զիջում պետք է հաստատվի հանրաքվեի միջոցով։
Խաղաղության բանակցությունների ընթացքում քննարկվում է նաեւ ռուսական զորքերի դուրսբերումը Խարկովի, Սումիի եւ Դնեպրոպետրովսկի շրջաններից։ Զապորոժիեի եւ Խերսոնի շրջաններում շփման գծերը կմնան անփոփոխ։ Միացյալ Նահանգները նաեւ առաջարկել է քննարկել Զապորոժիեի ատոմակայանի համատեղ կառավարման հնարավորությունը։