Այն բանից հետո, երբ Սիրիայի տարածքում տեղակայված թուրքական զինուժը սիրիական բանակի ավիահարվածների հետևանքով 34 զոհ տվեց մի գիշերում, տեսախցիկներն արձանագրել են, թե ինչպես է Թուրքիայի նախագահ Ռեջեփ Թայիփ Էրդողանն ԱՄՆ նախագահ Դոնալդ Թրամփի հետ հեռախոսազրույցի մասին պատմելիս մի պահ ժպտում։ Այս մասին գրում է Ermeni Haber-ը։
Դա տեղի է ունեցել իշխող «Արդարություն և զարգացում» կուսակցության գործադիր խորհրդի նիստի ժամանակ։
Տեսանյութի հրապարակումից հետո մարդիկ դժգոհություն հայտնեցին, որ երկրում սուգ է, իսկ երկրի ղեկավարը ժպիտով պատմություններ է պատմում:
Էրդողանը, անդրադառնալով այդ քննադատություններին, ասել է, որ Թրամփի հետ ունեցած հեռախոսազրույցի մասին պատմելիս իր դեմքի արտահայտությունը հեգնական է եղել: Նա նշել է, որ զարմացած է, որ այդ տեսանյութը հանրությունն այլ կերպ է ընդունել:
Թուրքիայի նախագահն այդ ամենն իր դեմ ուղղված «սատանայական արշավ» է որակել:
