ՀՀ ԱԺ «Լուսավոր Հայաստան» խմբակցության ղեկավար, առաջիկա ընտրություններում ԼՀԿ-ի վարչապետի թեկնածու Էդմոն Մարուքյանն այսօր մամուլի ասուլիսի ընթացքում խոսեց ներքաղաքական իրավիճակի մասին։
Նա ասաց, որ եթե նախկին և ներկա իշխանությունները քարոզարշավը շարունակեն այս ոգով, ապա բախումներից հնարավոր չի լինելու խուսափել։
Մարուքյանի խոսքով՝ երեկ դիտել են իշխանության նախընտրական ծրագրի ներկայացման հավաքն ու զարմացել են, որ «ինչ-որ ջղայն մարդիկ քննադատում էին ազգային համաձայնության կառավարության ձևավորմանը, համերաշխության օրակարգին, միասնական, միաբանված լինելուն` ընդդեմ մեր բոլորի թշնամու»։
ԼՀԿ ղեկավարը նշեց, որ եթե համերաշխությունը մերժվում է, դրա այլընտրանքը քաղաքացիական պատերազմն է։
Մարուքյանն ասաց, որ անհաշտ կողմերին ներքաղաքական խաղաղություն են պարտադրելու։