Մեն նահանգում հիմնված «Ֆարմերս Ալմանախ»-ը (Farmers’ Almanac) հրապարակել է 2026-2027 թվականների ձմեռային սեզոնի երկարաժամկետ կանխատեսումը։ Սա պարբերականի առաջին նման կանխատեսումն է հունվարին սեփականատերերի փոփոխությունից հետո։ Հրապարակման մեջ նշվում է, որ ԱՄՆ հյուսիս-արևելքը կարող է բախվել ձմեռային ամենաբարդ եղանակային պայմաններից մեկին։
«Ֆարմերս Ալմանախ»-ի կանխատեսող Քալեբ Ուեզերբին նշում է, որ առափնյա շրջաններում հնարավոր է անձրևների և խառը տեղումների ավելացում, մինչդեռ ներքին շրջանները կարող են տուժել հունվար և փետրվար ամիսներին սպասվող ծանր, թաց ձյան տեղումներից։ Փոքրիկ տեղաշարժերը փոթորիկների ուղեծրերում և ջերմաստիճանի տատանումները կարող են վճռորոշ լինել՝ որոշելով՝ կգա անձրև, ձնախառն անձրև, թե ձյուն։ Բնակիչներին հորդորում են պատրաստ լինել եղանակի արագ փոփոխություններին։
Պարբերականը, որը գործում է 1818 թվականից, օգտագործում է գաղտնի բանաձև, որը հիմնված է արեգակնային ակտիվության, լուսնի դիրքի, մակընթացությունների և պատմական տվյալների վրա։ Այս կանխատեսումը համահունչ է NOAA-ի (Օվկիանոսային և մթնոլորտային հետազոտությունների ազգային վարչություն) կլիմայական կանխատեսման կենտրոնի տվյալներին, որն ակնկալում է ուժեղ «Էլ Նինյո» երևույթ՝ 2026-ի վերջին և 2027-ի սկզբին տաք քամիների հավանականությամբ։
Գյուղատնտեսության համար այս անկանխատեսելի ցրտահարությունները կարող են լուրջ վտանգներ ստեղծել՝ ազդելով բերքատվության վրա։ Հարկ է նշել, որ «Ֆարմերս Ալմանախ»-ը պետք է տարբերել Նյու Հեմփշիրում գործող «Օլդ Ֆարմերս Ալմանախ»-ից (Old Farmers’ Almanac), քանի որ դրանք տարբեր հրատարակություններ են։