Վրաստանում շարունակվում են քաղաքական լարվածության աճը, որը ուղեկցվում է բողոքի ակցիաներով, ձերբակալություններով և արդարության պահանջներով, քանի որ քաղաքացիները, ակտիվիստներն ու ընդդիմադիր ուժերը պայքարում են մարդու իրավունքների խախտումների և համակարգային խնդիրների դեմ։
Դեկտեմբերի 9-ին ակտիվիստ Սանդրո Կինկլաձեն դատապարտվեց 12 օր բանտարկության՝ ոստիկանության հրահանգներին չենթարկվելու մեղադրանքով։ Նա ձերբակալվել էր դեկտեմբերի 8-ին՝ իր ընկերոջ այցելությունից հետո։ Կինկլաձեի խոսքով, իրեն ձերբակալած ոստիկաններից ոմանք քաղաքացիական հագուստով էին։ Նույն օրը խաղաղ ցուցարարներ Սաբա Չանկվետաձեն և Լուկա Կոտիաշվիլին, որոնք ենթարկվել էին ոստիկանության բռնությունների, տուգանվել են զգալի գումարներով՝ չնայած նրանց դեմ կիրառված դաժան վերաբերմունքին։
Բողոքի ակցիաները տարածվում են տարբեր վայրերում։ Ցուցարարները հավաքվել են TV Իմեդի հեռուստաալիքի շենքի դիմաց՝ մեղադրելով այն կառավարության քարոզչական գործիք լինելու մեջ։ Մշակութային ոլորտի ներկայացուցիչները ևս բողոքի ակցիա են անցկացրել Մշակույթի նախարարության շենքի դիմաց՝ պահանջելով աջակցություն անօրինական ձերբակալվածներին և արդարության վերականգնմանն ուղղված քայլեր։
Վրաստանի օմբուդսմեն Լևան Իոսելիանին հանդիպել է ԵՄ դեսպան Պավել Հերչինսկուն և ԱՄՆ դեսպան Ռոբին Դուննիգանին՝ քննարկելու ոստիկանության կողմից ցուցարարների դեմ կիրառված ուժի դեպքերը և նրանց իրավունքների խախտումները։ ԵՄ դեսպանը ոստիկանության գործողությունները որակել է որպես «սարսափելի» և «ցնցող»՝ կոչ անելով անհապաղ պատժել մեղավորներին։
Մինչդեռ, Վրաստանի իշխող «Վրացական երազանք» կուսակցության պատգամավորները ներկայացրել են նոր օրենսդրական փաթեթ, որը սահմանափակում է հրավառության արտադրանքի օգտագործումը ցույցերի ժամանակ։ Օրենքը նախատեսում է խիստ տուգանքներ և պատժամիջոցներ խախտումների համար, ինչը քննադատվում է որպես ցույցերի սահմանափակման քայլ։
Բաթումիում բողոքի ակցիաներն արդեն տևում են 12 օր։ Ցուցարարները շարունակում են իրենց պահանջները՝ աշխատակիցներին կոչ անելով միանալ շարժմանը։ Նման կոչեր հնչել են նաև մշակույթի ներկայացուցիչների կողմից, որոնք շեշտում են Եվրամիության արժեքների պաշտպանության կարևորությունը։
Ընդդիմադիր ուժերը համախմբվել են՝ մարդու իրավունքների խախտումների փաստերը գրանցելու և բարձրագույն պաշտոնյաների պատասխանատվության կանչելու նպատակով։ Նրանք ընդգծել են, որ օրենքի պահպանման մարմինները անտեսում են հասարակության պաշտպանությունը՝ չարձագանքելով հանցավոր խմբերի գործունեությանը։
Վրաստանում քաղաքական լարվածության աճը և մարդու իրավունքների պաշտպանությունն առաջնային են դառնում՝ ձևավորելով երկրի ապագա զարգացումների ուղին։
Հիշեցնենք, որ Վրաստանում տեղի ունեցող բողքի ակցիաները սկսեցին ծավալվել խորհրդարանական ընտրություններից հետո, երբ ընդդիմությունը այն հայտարարեց կողծված և սկսեց մեծ թափ ստանալ, երբ կառավարությունը հայտարարեց եվրոպական իտեգրման սառեցման մասին։