Գերմանիայի ֆուտբոլի ազգային հավաքականի մեկնարկային կազմի շուրջ բուռն քննարկումներ են ծավալվել Աշխարհի առաջնության մեկնարկից առաջ: Ինչպես հաղորդում է MagentaTV-ն, հայտնի մարզիչ Յուրգեն Կլոպը և ֆուտբոլիստ Թոմաս Մյուլերը հորդորել են գլխավոր մարզիչ Յուլիան Նագելսմանին՝ առաջիկա խաղում Ջամալ Մուսիալային դուրս թողնել մեկնարկային կազմից:
Մասնագետների կարծիքով՝ «Բավարիայի» կիսապաշտպանը դեռևս չի վերականգնել իր նախկին մարզավիճակը անցած ամռանը՝ Ակումբային աշխարհի առաջնության ժամանակ ստացած ծանր վնասվածքից հետո: Նրանք առաջարկում են Մուսիալայի փոխարեն խաղադաշտ դուրս բերել Դենիզ Ունդավին, իսկ Մուսիալային օգտագործել որպես փոխարինող՝ խաղի երկրորդ կեսում:
Այս հայտարարությունը սուր քննադատության է արժանացել Գերմանիայի հավաքականի լեգենդ Լոթար Մաթեուսի կողմից: Bild-ին տված հարցազրույցում Մաթեուսը նշել է, որ նման քննարկումները ավելորդ լարվածություն են ստեղծում հավաքականի շուրջ: «Ես շատ զարմացած էի, երբ լսեցի նրանց խորհուրդը։ Դա զուրկ է զգայունությունից։ Հաջողության հասնելու համար Գերմանիային անհրաժեշտ է Մուսիալայի որակը, ուստի նրան պետք է վստահել», – հայտարարել է Մաթեուսը:
Մաթեուսը հավելել է, որ թեև Մուսիալան դեռ իր լավագույն մարզավիճակում չէ, նման հրապարակային ճնշումը չի օգնում Նագելսմանի աշխատանքին: Ըստ նրա՝ Մուսիալան ԱՄՆ-ի դեմ վերջին խաղում արդեն իսկ ցուցադրել էր խաղային որակի բարելավում, և նման քննադատությունը կարող է վնասել ֆուտբոլիստի հոգեբանական վիճակին մրցաշարի նախաշեմին: