Կատարը համաձայն չէ հակաիրանական հայտարարություններին, որոնք ընդունել են Սաուդյան Արաբիայում անցկացված արաբական պետությունների առաջնորդների գագաթնաժողովի մասնակիցները: Այս մասին հայտարարել է Կատարի ԱԳ նախարար Մուհամմեդ բեն Աբդել Ռահման Ալ Թանին:
Ուրբաթ Մեքքայում տեղի էին ունեցել Արաբական պետությունների լիգայի (ԱՊԼ) և Պարսից ծոցի արաբական պետությունների համագործակցության խորհրդի (ՊԾԱՊՀԽ) առաջնորդների արտահերթ հանդիպումները, ըստ որոնց՝ դրանց մասնակիցները դատապարտել էին տարածաշրջանում Իրանի «ագրեսիվ գործողությունները» և նրա միջամտությունը արաբների ներքին գործերին:
«Կատարն առարկություններ ունի ԱՊԼ և ՊԾԱՊՀԽ գագաթնաժողովների արդյունքներով ընդունված հայտարարությունների կապակցությամբ, որովհետևդրանց որոշ կետեր հակասում են Դոհայի արտաքին քաղաքականությանը»,- Al Araby հեռուստաալիքին ասել է Կատարի ԱԳ նախարարը: Նա նշել է, որ հայտարարությունները կազմելիս ոչ ոք չի խորհրդակցել Կատարի հետ՝ կապված դրանցում հիշատակված ձևակերպումների հետ: Նա չի հստակեցրել, թե կոնկրետ որ կետերի մասին է խոսքը:
Մի շարք արաբական երկրներ, ներառյալ Սաուդյան Արաբիան, ԱՄԷ-ն և Բահրեյնը, հետագայում Կատարին քննադատել են հակաիրանական դիրքորոշմանն անհամաձայնության պատճառով: Սաուդյան Արաբիայի արտաքին գործերի պետական նախարար Ադել ալ Ջուբեյրը կիրակի իր Twitter-յան էջում զարմանք է հայտնել, թե ինչու Կատարի ներկայացուցիչներն իրենց առարկությունները չեն հայտնել անմիջաբար գագաթնաժողովի ժամանակ:
Շաբաթ Մեքքայում անցկացվել էր նաև Իսլամական համագործակցության կազմակերպության 14-րդ գագաթնաժողովը: Ալ Ջուբեյրը հայտնել էր, որ դրա արդյունքներով ևս իսլամական պետությունները «դատապարտել են տարածաշրջանում Իրանի քաղաքականությունը և ապակայունացնող վարքագիծը»:
2017 թվականի հունիսի 5-ին Սաուդյան Արաբիան, ԱՄԷ-ն, Բահրեյնը և Եգիպտոսը հայտարարել էին Կատարի հետ դիվանագիտական հարաբերությունների խզման մասին՝ Դոհային մեղադրելով ահաբեկչությանն աջակցելու և իրենց ներքին գործերին միջամտելու մեջ: Դրան հետևել էին տնտեսական պատժամիջոցները և էմիրության տրանսպորտային շրջափակումը: Դրանից հետո Կատարն իր հերթին խորացրել էր Թեհրանի հետ հարաբերությունները: Դոհայում, մասնավորապես, անհամաձայնություն էին հայտնել Իրանի դեմ նավթային պատժամիջոցների խստացման ԱՄՆ որոշմանը: