ՀՀ առողջապահության նախարարությունը մամուլի հաղորդագրություն է տարածել, որում ասվում է, որ սեզոանային գրիպի և քովիդի դեմ պատվաստումների թեմայով իրազեկման դասընթաց է կազմակերպվել։
- Ո՞րն է սեզոնային գրիպի կանխարգելման լավագույն միջոցը
- ՀՀ-ում ամբողջական պատվաստվածների թիվը մոտենում է 700 հազարին
«Առողջապահության նախարարությունը սեզոնային գրիպի և կորոնավիրուսային հիվանության (COVID-19) դեմ պատվաստումային գործընթացի բարելավման, բնակչության շրջանում պատվաստումների խրախուսման և վստահության մթնոլորտի ապահովման նպատակով կազմակերպել է զանգվածային լրատվամիջոցների ներկայացուցիչների համար եռօրյա իրազեկման դասընթաց` «Կորոնավիրուսային հիվանդության (COVID-19) համավարակի պայմաններում պատվաստումային գործընթացը. սեզոնային գրիպի և COVID-19-ի դեմ պատվաստումներ» թեմայով:
Դասընթացին Իմունականխարգելման ազգային ծրագրի ղեկավար Գայանե Սահակյանը ներկայացրել է պատվաստումային գործընթացը կորոնավիրուսային հիվանդության համավարակի պայմաններում, իսկ ԵՊԲՀ համաճարակաբանության ամբիոնի ավագ դասախոս Արման Բադալյանն անդրադարձել է որոշումների կայացման գործընթացում ապացուցողական տվյալների դերին և նշանակությանը:
ԱՆ Հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը խոսել է կորոնավիրուսային հիվանդության դեմ պատվաստումների, COVID-19-ով և սուր շնչառական վարակիչ հիվանդություններով պայմանավորված իրավիճակի մասին: Սեզոնային գրիպի և COVID-19-ի դեմ պատվաստումների կարևորության և դրանց շուրջ ստեղծված միֆերին է անդրադարձել Իմունականխարգելման և կառավարելի վարակիչ հիվանդությունների համաճարակաբանության բաժնի մանկաբույժ Պիրիջիդա Սիմոնյանը:
Եռօրյա դասընթացն անցել է պանելային քննարկումների, տարվա ընթացքում համաճարակային իրավիճակի ամփոփ տեղեկատվության, քաղած դասերի, ինչպես նաև լրագրողների հետ խաղերի, մտքերի փոխանակման ու հարցուպատասխանների ձևաչափով:
Դասընթացի ընթացքում մասնակիցները, ըստ ցանկության, առողջապահության նախարարության շրջիկ պատվաստումային խմբի կողմից պատվաստվել են սեզոնային գրիպի դեմ», – ասված է ԱՆ-ի տարածած հաղորդագրությունում։
