Վաղարշապատի ընտրությունների ընթացքում արձանագրվել են կուսակցությունների ֆինանսական հոսքերի վերահսկողության և թափանցիկության հետ կապված մի շարք խնդիրներ: «Ականատես» դիտորդական առաքելության հաղորդագրության համաձայն՝ Կոռուպցիայի կանխարգելման հանձնաժողովի (ԿԿՀ) և Կենտրոնական ընտրական հանձնաժողովի ներկայացրած ֆինանսական տեղեկանքներում առկա են անհամապատասխանություններ, որոնք խոչընդոտում են ընտրական գործընթացների թափանցիկության ապահովմանը:
Ըստ ՀՀ ընտրական օրենսգրքի վերջին փոփոխությունների՝ կուսակցությունների ֆինանսական հոսքերի վերահսկողությունը պետք է իրականացվի հետևյալ կերպ. բանկերը յուրաքանչյուր երեք աշխատանքային օրը մեկ ԿԿՀ-ին պետք է ներկայացնեն կուսակցությունների բանկային հաշիվների մնացորդի, մուտքերի և ելքերի վերաբերյալ տվյալներ: ԿԿՀ-ն այդ տվյալները ամփոփում և հրապարակում է իր կայքում: Զուգահեռաբար, ԿԸՀ վերահսկիչ-վերստուգիչ ծառայությունը ամփոփում է կուսակցությունների և դաշինքների նախընտրական հիմնադրամների ֆինանսական մուտքերի և ելքերի վերաբերյալ տվյալները և հրապարակում դրանք իր կայքում:
«Ականատես» դիտորդական առաքելությունը կոչ է անում ԿԿՀ-ին և ԿԸՀ-ին ապահովել տվյալների ճշգրտությունը և համագործակցությունը՝ ընտրական գործընթացների թափանցիկությունն ու ֆինանսական հոսքերի վերահսկողությունը բարելավելու նպատակով: Առաքելությունը նաև ընդգծում է, որ քաղաքական ֆինանսավորման թափանցիկությունն ապահովելու պարտավորություն ունեցող այս երկու կառույցների չհամակարգված աշխատանքը խոչընդոտում է ընտրությունների արդար և թափանցիկ անցկացմանը:
Այս խնդիրները վկայում են, որ գործող իշխանությունները չեն կարողանում կամ չեն ուզում ապահովել տվյալների հրապարակման հստակ և համակարգված գործընթացը: