2026 թվականի NBA-ի ազատ գործակալների շուկայում գլխավոր թեման Լեբրոն Ջեյմսի հնարավոր վերադարձն է «Կլիվլենդ Կավալիերս»։ Լոս Անջելես «Լեյքերսից» հեռանալուց հետո 41-ամյա բասկետբոլիստը դարձել է լիգայի ամենաքննարկվող անունը, իսկ ոլորտի փորձագետները, այդ թվում՝ Բիլ Սիմոնսը, հայտարարում են, որ գործարքը փաստացի ավարտված է։
Սիմոնսի խոսքով՝ «Գոլդեն Սթեյթ Ուորիորսի» կամ այլ ակումբների հետ կապված լուրերը եղել են ընդամենը լծակներ՝ ավելի լավ պայմաններ ստանալու համար, իսկ իրական նպատակակետը եղել և մնում է Կլիվլենդը։ Ըստ The Athletic-ի, ակումբն արդեն սկսել է հստակ քայլեր ձեռնարկել՝ ազատելու աշխատավարձային ֆոնդը։ Մասնավորապես, Դենիս Շրյոդերը և Մաքս Ստրուսը հայտնվել են փոխանակման թեկնածուների ցանկում, ինչը թույլ կտա ակումբին մոտ 31,4 միլիոն դոլարի ազատ տարածք ստեղծել՝ Ջեյմսի պայմանագիրը գրանցելու համար։
ESPN-ի լրագրող Բրայան Ուինդհորսթը նշում է, որ «Կավալիերսը» ոչ միայն հուզական, այլև մարզական առումով ամենահարմար տարբերակն է։ Ի տարբերություն այլ թիմերի, Կլիվլենդն ունի երիտասարդ և հավակնոտ կազմ՝ Էվան Մոբլիի, Ջարեթ Ալենի և Դոնովան Միթչելի գլխավորությամբ, ինչը Ջեյմսին թույլ կտա չծանրաբեռնվել և պայքարել չեմպիոնության համար՝ իր կարիերայի վերջին փուլում։
Թեև Ֆիլադելֆիան և Մայամին դեռևս փորձում են բանակցել Լեբրոնի ներկայացուցիչ Ռիչ Փոլի հետ, ակումբի ղեկավարության կողմից իրականացվող կադրային փոփոխությունները վկայում են, որ Կլիվլենդը լրջորեն է տրամադրված հայրենի քաղաք վերադարձնելու NBA-ի պատմության լավագույն ռմբարկուներից մեկին։