Հունահռոմեական ոճի ըմբշամարտի Հայաստանի հավաքականի գլխավոր մարզիչ Լևոն Ջուլֆալակյանն այսօր հանդիպում է ունեցել լրագրողների հետ.
Անդրադարձ է եղել նաև Արսեն Ջուլֆալակյանին, որը Նիսի մրցաշարի ժամանակ ոսկե մեդալ էր նվաճել.
«Նախ կցանկանամ նշել, որ ինձ համար փոքր-ինչ զարմանալի էր, որ որոշ լրատվամիջոցներ գրում էին, որ ոչ թե Եվրոպայի ու աշխարհի չեմպիոն, Օլիմպիական խաղերի մրցանակակիր Արսեն Ջուլֆալակյանն է ոսկե մեդալ նվաճել Նիսի մրցաշարում, այլ՝ առաջին հերթին շեշտում են նրա՝ ԱԺ պատգամավոր լինելը:
Նախքան պատգամավոր դառնալը՝ Արսեն Ջուլֆալակյանը լուրջ սպորտային ճանապարհ է անցել, լուրջ ուսումնական ճանապարհ: Նա գերազանց ավարտել է համալսարանը, սովորել է մագիստրատուրայում, լուրջ հաջողություններ է գրանցել սպորտում: Իսկ այդ ամենի մասին չի խոսվում: Շատ պատվավոր է պատգամավոր լինելը:
Կարծում եմ՝ նման պատգամավորներ շատ են պետք մեր հանրապետությանը: Վստահ եմ՝ իր գիտելիքներով և նվիրվածությամբ շատ օգտակար կլինի մեր ազգին ու ժողովրդին: Արսենը դպրոցում էլ համալսարանում էլ գերազանց էր սովորում, ու կարողանում էր համատեղել գերազանց մարզական կարիերայի հետ:
Կարծում եմ՝ հիմա էլ կկարողանա: Նա էներգիայով լի անձնավորություն է, կարողանում է ժամանակը ճիշտ պլանավորել, որպեսզի մեկը մյուսին չխանգարի: Գիտեմ, որ մեր կառավարությունն էլ նրա հնարավորություն է տալու, օրինակ կարևոր մրցումների ժամանակ բացակայելու դեպքում, դրանք համարել հարգելի: Կարծում եմ՝ Արսենին չի խանգարի իր պատգամավոր լինելը: Նա շատ լուրջ նպատակներ ունի ու պետք է ամեն ինչ անի՝ դրանց հասնելու համար:
Մենք միշտ միասին քննարկում ենք բոլոր հարցերը: Ես նորմալ եմ վերաբերվել: Ասացի՝ եթե դա քո ընտրությունն է, ուրեմն ես կողմնակից եմ: Մնում էր միայն հասկանալ՝ կարո՞ղ է սպորտը շարունակել, թե՞ ոչ: Եկանք ընդհանուր հայտարարի, որ մեկը մյուսին չի խանգարելու»,- ասել է Ջուլֆալակյանը:
Հաղորդում է armsport.am-ը։
![](https://azat.tv/wp-content/uploads/2022/09/azattvlogoblack.png)