Նյու Յորքի քաղաքապետ Զոհրան Մամդանին հանձնարարել է քաղաքային բոլոր գերատեսչություններին մշակել ծախսերի 2.5%-անոց կրճատման ծրագրեր՝ 2027 և 2028 ֆինանսական տարիների համար։ Այս քայլը կոչված է նախապես արձագանքելու սպասվող բյուջետային ճգնաժամին։ Ըստ Նյու Յորքի հաշվեքննիչ Մարկ Լևինի՝ քաղաքը հաջորդ տարի բախվելու է առնվազն 6 միլիարդ դոլարի դեֆիցիտի։
Այս կարգադրությունը հաջորդում է 2027 ֆինանսական տարվա համար ներկայացված 124.7 միլիարդ դոլարի բյուջեին։ Քաղաքապետ Մամդանին ընդգծել է, որ նպատակը ոչ թե հանրային ծառայությունների կրճատումն է, այլ կառավարման արդյունավետության բարձրացումը։ «Յուրաքանչյուր դոլար, որը մենք խնայում ենք կառավարման բարելավման միջոցով, դոլար է, որը կարող ենք ուղղել նյույորքցիների համար կարևոր ծառայություններին», – նշել է Մամդանին։
Խնայողություններն արդյունավետ դարձնելու համար քաղաքային իշխանությունները հարցում են անցկացնում աշխատակիցների շրջանում՝ անարդյունավետ ծախսերը բացահայտելու նպատակով։ Ավելի վաղ յուրաքանչյուր գերատեսչությունում նշանակվել են խնայողությունների գծով գլխավոր պատասխանատուներ, որոնք, ըստ քաղաքային իշխանությունների, արդեն ապահովել են 1.77 միլիարդ դոլարի խնայողություն։ Բացի այդ, ստեղծվել է Կառավարման արդյունավետության հանձնաժողով (COGE), որը պետք է վերանայի Նյու Յորքի կանոնադրությունը՝ արդիականացման և ծախսերի օպտիմալացման հնարավորությունները գտնելու համար։ Մարկ Լևինը ողջունել է քաղաքապետի այս նախաձեռնությունը՝ այն որակելով որպես «խելամիտ քայլ»։