Հիշու՞մ եք Mars One ստարտափը, որը հայտարարել էր, որ պատրաստվում է ֆինանսավորել մի մարսյան թռիչք, որը սովորական ճամփորդությունից կվերածվի իսկական հեռուստաշոուի: Հիմա, այդ կազմակերպությունը սնանկացել է, ըստ հրապարակված ֆինանսական փաստաթղթերի:
Engadget-ի հետ զրույցում Mars One-ի համահիմնադիր Բաս Լանսդորպը հաստատել է սնանկացման մասին պտտվող լուրերը: Նա նշել է, որ փորձում է լուծում գտնել, որպեսզի կարողանա շտկել առաջացած ֆինանսական խնդիրները, բայց, ցավոք, այդքան էլ վստահ չէ, որ կկարողանա իրագործել նախագիծը:
Սնանկացման մասին առաջին լուրերը հայտնվել էին Reddit-ում, որտեղ օգտատերերից մեկը հրապարակել էր շվեցարական ֆինանսական փաստաթղթերի մի հղում, համաձայն որի կազմակերպությունը կլուծարվի:
Mars One-ը, իրականում, կազմված է երկու մասից. առաջինը շահութաբեր մասն է, որ կոչվում է Mars One Ventures, և կա ոչ շահութաբեր մաս, որը կոչվում է Mars One Foundation: Ըստ տվյալների, կազմակերպության շահութաբեր հատվածն է սնանկացել: Բայց, Լանսդորպը տեղեկացնում է, որ առանց ֆինանսավորման ոչ շահութաբեր մասը ևս չի կարող շարունակել իր աշխատանքները:
Դեռ 2012 թվականին Լանսդորպը և իր գործընկերները հայտարարել էին, որ պատրաստվում են կոլոնիզացնել Կարմիր մոլորակը: Չնայած, թվում է, թե երազանքն արդեն մահացած է, այն դեռ գոյություն ունի կազմակերպության կայքում:
Այնտեղ մասնավորապես նշված է. «Mars One-ի նպատակն է ստեղծել մարդկության համար հիմանական բնակատեղի Մարսի վրա: Մի քանի թռիչքներ կիրագործվեն առանց ուղևորների, որոնք կստեղծեն բնակելի վայրեր, որից հետո արդեն հատուկ պատրաստված և վարժված անձնակազմերը կհաստատվեն Մարսի վրա: Այս պլանի ֆինանսավորումն ու իրագործումը, իհարկե, հեշտ չէ, այն չափազանց բարդ է»:
Աղբյուրը՝ Futurism
Թարգմանությունը՝ Azat TV
