Մի քանի շեշտադրում Ամուլսարի վերաբերյալ․ Լևոն Գալստյան

Բնապահպան Լևոն Գալստյանը ֆեյսբուքյան իր էջում գրել է․

«Մի քանի շեշտադրումներ ‼️

✅ 2011-2018թթ․ հանրության տարբեր շերտեր՝ նաև Ջերմուկ համայնքի բնակիչներ, անդադար պայքարել են հանուն Ամուլսարի փրկության։

✅ Այդ ընթացքում կիրառվել են պայքարի գրեթե բոլոր հնարավոր եղանակները՝ ակցիաներ, երթեր, բողոքի դիմումներ ու պահանջագրեր բոլոր հնարավոր պետական մարմիններին և միջազգային կառույցներին, դատական գործեր, մասնագիտական լրջագույն հիմնավորումներ և այլն։

✅ Նաև այս բոլոր գործողություններն որոշ չափով պատճառ դարձել, որ 2009թ-ից ունենալով բոլոր թույլտվությունները՝ Ամուլսարում հանքի շինարարական աշխատանքները մինչև 2016թ-ի աշունն այդպես էլ չեն սկսվել։

✅ 2016թ-ից հետո էլ պայքարը չի դադարել և մի խումբ ՀՀ քաղաքացիներ բոլոր եղանակներով շարունակել են ընդդիմանալ այդ ծրագրի իրականացմանը։

✅ 2017-2018թթ․ տեղի բնակիչներն արդեն իսկ իրենց մաշկի վրա զգացել են շինարարական աշխատանքների դառը հետևանքներն ու սկսել մտածել ավելի ակտիվ գործողությունների մասին։

✅ 2018թ-ի ժողովրդական հեղափոխությունը մարդկանց հույս է ներշնչել, որ նոր կառավարությունը կկասեցնի այս ծրագիրը՝ հենց հեղափոխության տրամաբանության շրջանականերում։

✅ Մայիսի 29-ին մի շարք կազմակերպությունների և գիտնականների կողմից հիմնավոր դիմում է ներկայացվում նոր վարչապետ Նիկոլ Փաշինյանին, որտեղ ներկայացված էին Ամուլսարի ծրագրի դադարաեցման մասնագիտական, իրավական և սոցիալ-էկոլոգիական հիմքերը։ Սակայն դիմումն այդպես էլ մնում է անպատասխան, և միայն չորս ամիս անց ինչ-որ անհասկանալի բովանդակությամբ գրություն է գալիս բնապահպանության նախարարությունից։

✅ Ջերմուկ համայնքի բնակիչներն այդ ընթացքում նախազգուշացման նպատակով երկու անգամ փակում են դեպի լեռան գագաթ տանող հողային ճանապարհները, բայց նոր կառավավարությունից համարժեք արձագանք չստանալուց հետո՝ հունիսի 22-ից արդեն անժամկետ փակում են լեռան մուտքերն ու կասեցնում շինարարական աշխատանքները։

✅ Հուլիս ամսին Քննչական կոմիտեում հարուցվում է քրեական գործ մի ՀՀ քաղաքացու դիմումի համաձայն։ Միայն մեկ տարի անց է պարզվում, որ այդ քաղաքացին նախկին փոխոստիկանապետ է, և ով զարմանք, քննիչներն իրենք են որոշել ընթացք տալ այդ մարդու դիմումին՝ չնայած նա դեմ է եղել դրան։ Զարմանալի է, որ ոչ մի այլ դիմումների ընթացք չի տրվել, բայց այ նախկին փոխոստիկանապետինին տրվել է։ Տեսնես ո՞վ է այդ մարդը։

✅ Այդ քրեական գործի հարուցումից հետո ՀՀ կառավարությունը մի կողմ է քաշվում և չգիտես ինչու անընդհատ շեշտում, որ ամեն ինչ որոշվելու այդ քրեական գործի շրջանակներում։

✅ Քրեական գործի շրջանականերում արդեն ձմռանը պատվիրվում է միջազգային փորձաքննություն։ Փաշինյանն անընդհատ նշում է, որ կառավարությունը սպասում է դրա արդյունքներին։

✅ Ուսումնասիրությունն իրականացնում են լիբանանյան և ամերիկյան ընկերությունները, որոնց արդյունքները ներկայացնում է քննչական կոմիտեն, բայց ակնհայտ խեղաթյուրված՝ իբր եզրակացությունը դրական է։

✅ Հանրային աղմուկի հետևանքով բացահայտվում են քննչականի աղաղակող մանիպուլյացիաներն ու թույլ տված խախտումները։ Նաև պարզվում է, որ գործը քննող խմբի ղեկավար Իվանյանը 2016թ-ին Ամուլսարի ծրագրի դրական եզրակացությունը հաստատած նախկին նախարարի հորեղբոր որդին է։

✅ Վարչապետը տեսակոնֆերանս է կազմակերպում միջազգային փորձագիտական խմբի անդամների հետ, որոնք հաստատում են, որ այս պայմաններում և ունեցացած տվյալների հիման վրա Ամուլսարում հանք շագահործելու անվտանգ լինելու երաշխավորություն իրենք չեն կարող տալ և դրա մասին հստակ գրել են իրենց 300 էջանոց զեկույցում։

✅ Թվում էր, թե այսքանից հետո ամեն ինչ այնքան ակնհայտ է, որ միակ որոշումը պետք է լինի ուժը կորցրած ճանաչել 2016թ-ին տրված դրական եզրակացությունը։ Բայց այդ տեսակոնֆերանսից մի քանի օր անց վարչապետն ուղիղ եթերով կոչ է անում ջերմուկցիներին բացել Ամուլսարի գագաթ տանող ճանապարհները։

✅ Վարչապետի բերած հիմնավորումներն այնքան անտրամաբանական են, որ չեմ էլ ուզում նույնիսկ դրանց հակադարձել՝ հատկապես, որ արդեն ասվել է դրա մասին շատերի կողմից և շատ հիմնավոր կերպով։

✅ Այսքանից հետո մնում է գուշակել, թե ի՞նչ ճնշումներ են գործադրվում մեր պետության վրա և շարունակել Ամուլսարի փրկության պայքարը նույն կերպ՝ ինչպես արել ենք վերջին ութ տարվա ընթացքում։

Ամուլսարը լեռ է»։