«Աշխատանքային օրվա ավարտին հյուրընկալվեցի Թումո ստեղծարար տեխնոլոգիաների կենտրոնում։
Մարի Լու Փափազյանի հետ կենտրոնում շրջայց կատարելուց հետո ևս մեկ անգամ համոզվեցի, որ մեկ կամ մի քանի հոգու երազանքը բավական է աշխարհը փոխելու, այն ավելի լավը դարձնելու համար։
Թումոն յուրօրինակ հաջողության պատմություն է, որտեղ մեկ հզոր գաղափարը փոխել է տասնյակ հազարավորների կյանքը՝ արդեն տարբեր աշխարհամասերում։
Երևանի Թումոյում այժմ 12-18 տարեկան շուրջ 15.000 պատանի ստանում է արտադպրոցական ուսուցում թվային մեդիաների ոլորտում՝ հատուկ մշակված ուսումնական ծրագրով, ծանոթանում 3D մոդելավորման, ֆիլմերի և երաժշտության պատրաստման, ռոբոտաշինության, լուսանկարչության, գրաֆիկական դիզայնի և այլ ոլորտների նրբություններին։
Այստեղ հավատում են, սովորեցնում, տալիս անհրաժեշտ գործիքները՝ տեխնոլոգիաների անծայր աշխարհում նորույթներ ստեղծելու համար։
Թումոն հայկական բրենդ է, որին պիտի օգնենք տարածվելու և հասանելի դառնալու ամբողջ աշխարհում», – գրել է ԱԺ պատգամավոր, Կրթության, գիտության, մշակույթի, սփյուռքի, սպորտի և երիտասարդության հարցերի մշտական հանձնաժողովի նախագահ Մխիթար Հայրապետյանը ֆեյսբուքյան իր էջում։
https://www.facebook.com/MkhitarHayrapetyanOfficial/posts/670904553374678