Մյանմայի ռազմական հեղաշրջման առաջնորդ, ավագ գեներալ Մին Աունգ Հլաինգն ապրիլի 3-ին ընտրվել է երկրի նախագահ։ Քվեարկությունն անցկացվել է ռազմական ուժերի կողմից վերահսկվող խորհրդարանում, որտեղ նա ստացել է 584 ձայնից 429-ը։ Այս քայլով 2021 թվականի հեղաշրջումից հետո երկիրը ղեկավարող գեներալը պաշտոնապես անցում է կատարում ռազմական խունտայի ղեկավարից քաղաքացիական նախագահի կարգավիճակին։
Միջազգային իրավապաշտպան կազմակերպությունները, այդ թվում՝ Amnesty International-ը, շտապել են հայտարարել, որ նախագահի պաշտոնը Մին Աունգ Հլաինգին չի ազատում պատասխանատվությունից։ Նա մեղադրվում է 2017 թվականին ռոհինջա փոքրամասնության դեմ իրականացված հանցագործությունների մեջ, և նրա դեմ Միջազգային քրեական դատարանում (ՄՔԴ) քննարկվում է ձերբակալման օրդեր տալու հարցը։ Փորձագետների կարծիքով՝ այս քաղաքական վերադասավորումը միտված է ոչ թե ժողովրդավարացմանը, այլ ռազմական ղեկավարությանը միջազգային իրավական ճնշումներից պաշտպանելուն։
Այս ընտրությունները տեղի են ունենում երկրում շարունակվող դաժան քաղաքացիական պատերազմի ֆոնին, որը բռնկվել է 2021 թվականի հեղաշրջումից հետո։ Գեներալը, պաշտոնի անցնելու համար հրաժարվելով զինված ուժերի գլխավոր հրամանատարի պաշտոնից, այդտեղ նշանակել է իր վստահելի օգնական գեներալ Ե Վին Օ-ին։ Այս քայլով ռազմական խունտան ամրապնդում է իր վերահսկողությունը պետական ապարատի նկատմամբ՝ միաժամանակ շարունակելով ռազմական ճնշումները ընդդիմադիր խմբավորումների նկատմամբ։