Datalex տեղեկատվական համակարգից տեղեկանում ենք, որ ԱԺ պատգամավոր Թագուհի Թովմասյանի դատական հայցն ընդդեմ ԱԺ փոխնախագահ Լենա Նազարյանի հետ է վերադարձվել:
Համաձայն կայքի՝ Թովմասյանը հունիսի 30-ին հայցադիմում է ներկայացրել ՀՀ Երևան քաղաքի առաջին ատյանի ընդհանուր իրավասության դատարան ընդդեմ Նազարյանի` վիրավորանք համարվող արտահայտության համար հրապարակայնորեն ներողություն խնդրելու և փոխհատուցում վճարելու պահանջների մասին:
- Թագուհի Թովմասյանը «իդիոտկայի» համար դատի է տվել Լենա Նազարյանին
- Իդիոտկա․ Լենա Նազարյանը՝ Թագուհի Թովմասյանին
Դատարանը վերադարձրել է դիմումը՝ հետևյալ պատճառաբանությամբ. Թովմասյանը լիարժեք չի վճարել պետական տուրքերը. նա ներկայացրել էր մեկ ոչ գույքային պահանջ, որի համար պետք է վճարեր 4000 դրամ պետական տուրք, 1 մլն դրամ գումարի բռնագանձման պահանջ, որի համար պետք է վճարեր 20 հազար դրամ պետական տուրք: Այսինքն՝ ընդհանուր առմամբ հայցվորը պետք է վճարեր 24 հազար դրամ պետական տուրքի գումար, այնինչ նա վճարել է 8000 դրամ:
Մինչ այս հայտնի էր, որ հունիսի 3-ին ԱԺ-ում միջադեպ էր գրանցվել. պատգամավոր Թագուհի Թովմասյանի ելույթից հետո ԱԺ փոխխոսնակ, նիստը վարող Լենա Նազարյանը շշուկով «իդիոտկա» էր ասել: Խոսափողը միացված է եղել, ուստի այդ բառը լսվել է: