Ադրբեջանի նախագահ Իլհամ Ալիևը՝ Բաքվում հայկական ռազմավարի պուրակի բացման հանդիսավոր արարողությանը հայտարարել է, որ 2016թ. պատերազմից հետո այն ժամանակ Հայաստանի նախագահ Սերժ Սարգսյանը խոստացել էր վերադարձնել «օկուպացրած տարածքները» և դրա համար խնդրել էր երկու շաբաթ ժամանակ:
Ալիևի խոսքով՝ դրան խանգարել է Երևանի ՊՊԾ գնդի գրավումը, և հենց դրա վրա էլ հիմնվելով՝ Սարգսյանը հրաժարվել է կատարել խոստումը:
Ադրբեջանի նախագաը նշել է, որ 2018թ. հեղափոխությունից հետո իշխանության եկած Նիկոլ Փաշինյանը նույնպես խոստացել է լուծել խնդիրը և ժամանակ խնդրել՝ ներքաղաքական հարցերը կարգավորելու համար, «բայց հայերը կրկին խաբեցին», և «պարզ էր, որ բանակցություններն անիմաստ են»:
Ալիևի խոսքով՝ տարիներ շարունակ միջազգային միջնորդները, բանակցություններ վարելով, խաբել են իրենց: Նրանք փորձել են ոչ թե լուծել, այլ սառեցնել հակամարտությունը, քանի որ ցանկանում էին «օկուպացված տարածքները թողնել հայերին»:
«Այդ պատճառով բանակցություններին զուգահեռ նախապատրաստական աշխատանքներ են տարվել, և մենք դա չենք թաքցրել», – ասել է նա:
Նրա խոսքով՝ պատերազմի ժամանակ Ադրբեջանի դեմ ցանկանում էին պատժամիջոցներ սահմանել: «Դա ցանկանում էին Մինսկի խմբի մեջ մտնող երկրներ, բայց Չմիացած երկրների մեր բարեկամ երկրները կանխեցին դա»,- ասել է Ալիևը:
