Ստուգումների իրականացման կարգ գոյություն ունի, և ցանկացած պահի կամ կամայականորեն հնարավոր չէ ինչ-որ մի տնտեսվարողի նկատմամբ ստուգումներ իրականացվեն։ Այս մասին, ամփոփելով 2019 թվականը, հրավիրված մամուլի ասուլիսի ժամանակ ասաց ՊԵԿ նախագահի տեղակալ Էդվարդ Հովհաննիսյանը:
Նա նշեց, որ ստվերի շրջանառության բացահայտման ուղղությամբ 86 դեպքով արձանագրվել են շոշափելի արդյունքներ և ընդհանուր շրջանառության համախառն եկամտի ծավալը ավելացել է մեկ միլիարդ 571 միլիոն դրամով և 214 միլիոն դրամ վերականգնվել է բյուջե, և դա վերաբերում է միայն իրավական ստորաբաժանումներին:
Հովհաննիսյանի խոսքով՝ 2019-ի ընթացքում պետբյուջե է վերականգնվել 5.5 մլրդ դրամ՝ 1.3 մլրդ դրամով ավելի քիչ, քան նախորդ տարի։
Անդրադառնալով բիզնեսի արհեստական տրոհմանը՝ պաշտոնյան ասաց, որ 39 գործող բիզնես տրոհվել է 96 հարկ վճարողների միջև՝ շրջանառության ծավալները բաշխելու և ավելացրած արժեքի հարկի դաշտում գործելուց խուսափելու նպատակով:
«Ընդհանուր առմամբ իրավական ստորաբաժանումների կողմից կատարված աշխատանքների արդյունքում պետական բյուջե է վերականգնվել 46,8 միլիարդ դրամ հարկի գումար՝ նախորդ տարվա 24,5 միլիարդ դրամի փոխարեն: 46,8 միլիարդի մեջ մեծ մասը բաժին էր ընկնում բռնագանձման աշխատանքների արդյունքում վերականգնված գումարը՝ մոտ 37 միլիարդ դրամ, սա նշանակում է, որ հարկ վճարողների կողմից առաջացած հարկային պարտավորություններն ավելի շատ վերականգնվել են բռնագանձման աշխատանքների շնորհիվ»,-ասաց նա:
Ըստ Էդվարդ Հովհաննիսյանի՝ ՊԵԿ-ի նկատմամբ քաղաքացիների վստահությունը բարձրացել է: Նա հայտնեց, որ շոու բիզնեսի մոտ տասը ներկայացուցիչ՝ հարկային մարմին է ներկայացրել հայտարարագրեր և վճարել հարկային պարտավորություններ:
«Որոշ ներկայացուցիչների նկատմամբ հարուցվել են քրեական գործեր, որոնք հիմա նախաքննության փուլում են»,-ասաց նա:
Անդրադառնալով ԲՀԿ նախագահ Գագիկ Ծառուկյանի հայտարարությանը, թե հարկային ստուգումները միայն իր նկատմամբ են իրականացվում, ՊԵԿ նախագահի տեղակալը բացառեց տնտեսվարողների մոտ թիրախային ստուգումները։
«Ստուգումների իրականացման կարգ գոյություն ունի, և ցանկացած պահի կամ կամայականորեն հնարավոր չէ ինչ-որ մի տնտեսվարողի նկատմամբ ստուգումներ իրականացվեն։ Դրա համար անհրաժեշտ են համապատասխան օրենսդրական պահանջների առկայություն, նոր միայն դրանից հետո հնարավոր է լինում ստուգումների իրականացում»,-ասաց նա:
ԽՈՐՀՈւՐԴ Է ՏՐՎՈւՄ ԿԱՐԴԱԼ
